قىزىل عالامشارعا ادام اياعى تيەتىن كۇن الىس ەمەس

استانا. قازاقپارات - ا ق ش- تىڭ ناسا ا ە ر و عارىش اگەنتتىگى مارستى يگەرۋ باعدارلاماسى شەڭبەرىندە قىزىل عالامشارعا ۇشقىسى كەلەتىندەردەن ءوتىنىش قابىلداۋ مەرزىمىن جاريالادى.

سونىمەن اتالعان اسپان دەنەسىنە ساياحات جاساۋدى كوزدەگەندەر وسى جىلدىڭ 14 - جەلتوقسانىنان باستاپ ءوز وتىنىشتەرىن بىلدىرە الادى. قابىلداۋ مەرزىمى كەلەر جىلعى اقپان ايىنىڭ ورتاسىنا دەيىن جالعاسادى. ال تاڭدالعان ۇمىتكەرلەردىڭ ەسىمدەرى 2017  جىلدىڭ ورتاسىندا بەلگىلى بولادى.

وسىعان بايلانىستى ناسا بولاشاق استروناۆتارعا ءبىرقاتار تالاپ قويىپ وتىر. اتاپ ايتقاندا، عالامشاردى كورگىسى كەلگەندەر ەڭ الدىمەن ا ق ش ازاماتى بولۋلارى كەرەك. سونداي- اق، ولار اككرەديتتەلگەن وقۋ ورىندارىندا ينجەنەريا، بيولوگيا، فيزيكا جانە ماتەماتيكا سالالارى بويىنشا كەم دەگەندە باكالاۆر دەڭگەيىندە جوعارى ءبىلىم الۋلارى ءتيىس. ودان بولەك، ۇمىتكەرلەر ماماندىقتارى بويىنشا ءۇش جىلدان ارتىق ەڭبەك ەتۋگە مىندەتتى نەمەسە رەاكتيۆتى ۇشاقتىڭ كومانديرى رەتىندە مىڭ ساعاتتان كوپ ۇشقانىن دالەلدەيتىن قۇجاتى بولۋى شارت. ەڭ سوڭىندا ءوتىنىش بىلدىرگەندەر فيزيكالىق توزىمدىلىك پەن ۇزاق مەرزىمدى ۇشۋعا شىدامدىلىقتى ايقىندايتىن ناسا- نىڭ ارنايى سىناعىنان وتەدى.

ايتا كەتەيىك، سوڭعى كەزدەرى اگەنتتىك قىزىل عالامشاردى يگەرۋ جۇمىستارىن وتە قارقىندى جۇرگىزۋدە. ءتىپتى، تاياۋدا وسى باعىتتاعى ءۇش دەڭگەيلى باعدارلاماسىن دا كوپشىلىكتىڭ نازارىنا ۇسىندى. سونىڭ نەگىزىندە ناسا 2030 -جىلداردىڭ ورتا تۇسىندا مارسقا العاشقى استروناۆتاردى قوندىرۋدى جوسپارلاپ وتىر.

سونىمەن قاتار، اتالعان ۆەدومستۆو وسى جىلدىڭ مامىر ايىندا كورشى عالامشاردا ارنايى بازانىڭ قۇرىلىسىن جۇرگىزۋ ءۇشىن بايقاۋ جاريالاعانىن اتاپ وتكەن ءجون. تالاپ بويىنشا ونداعى عيماراتتار D3 پرينتەر تەحنولوگياسى بويىنشا سالىنباقشى.

 

ەلامان قوڭىر،«ەگەمەن قازاقستان» .