ستۋدەنت ەمتيحانعا ۇلگەرۋ ءۇشىن اۆتوبۋستى ايداپ كەتتى

استانا. قازاقپارات - وڭتۇستىك افريكا رسەپۋبليكاسىندا ستۋدەنت ەمتيحانعا ۇلگەرۋ ءۇشىن اۆتوبۋستى ايداپ كەتكەن.

eNCA تەلەارناسىنىڭ حابارلاۋىنشا، 20 جاستاعى ستۋدەنت جانە ونىڭ ءبىر توپ كۋرستاستارى ەمتيحان تاپسىرۋعا بارا جاتقان ساتتە جولدا اۆتوبۋس توقتاپ، جۇرگىزۋشى سىرتقا شىققان. اۆتوبۋس وقۋ مەكەمەسىنەن 30 شاقىرىمداي قاشىقتىقتا بولعان. ءبىراق جۇرگىزۋشى ۇزاق ۋاقىت كەلمەگەن. ونىڭ ورالۋىن كۇتپەگەن ستۋدەنت رۋلگە وتىرىپ، ءوز كۋرستاستارىن ەمتيحانعا الىپ كەلگەن.

جولدا اۆتوبۋستى پوليتسەيلەر توقتاتتى. الگى جىگىتكە 360 دوللار ايىپپۇل سالىندى. ايتا كەتەرلىگى، ستۋدەنتتەر ەمتيحانعا ۇلگەردى.

ال ايىپپۇل تولەۋگە ونىڭ كۋرستاستارى مەن دوستارى كومەكتەستى.