گەرمانيالىق رەجيسسەر پاۆلودار وبلىسىندا فيلم ءتۇسىرىپ ايىپپۇل تولەدى
ءىس ماتەريالدارىنا سۇيەنسەك، شەتەلدىك مەيمان شارباقتى ءوڭىرىن ۇناتىپ قالعانى سونشالىق، اۋداندا تىركەۋسىز ءۇش كۇن ءجۇرىپ قالعان. پاۆلودار وبلىستىق سوتىنىڭ باسپا ءسوز حاتشىسى جانار جۇماتايەۆانىڭ حابارلاۋىنشا، رەجيسسەر - موڭعوليا ەلىنىڭ ازاماتى.
ال تۇراقتى مەكەنى گەرمانيا ەكەن. شارباقتى اۋدانىنا ايەلى جانە ءۇش بالاسىمەن ساياحاتتاپ كەلگەن. ولار گەرمانيادان موڭعولياعا بەت العان. ايتا كەتەرلىگى، رەجيسسەر جول-جونەكەي «دەتي پو شەلكوۆومۋ پۋتي» فيلمىن ءتۇسىرىپ جاتىر ەكەن.
«سوت وتىرىسىندا قۇقىق بۇزۋشى كىناسىن تولىق مويىنداپ، تىركەۋدىڭ قاجەتتىلىگى تۋرالى بەيحابار ەكەنىن جەتكىزدى. سوت ونى ق ر اكىمشىلىك قۇقىق بۇزۋشىلىق كودەكسىنىڭ 517-بابىنىڭ 2-بولىگى بويىنشا كىنالى دەپ تانىدى. وعان 15 ا ە ك كولەمىندە، ياعني 29730 تەڭگە ايىپپۇل سالۋ تۇرىندە جازا تاعايىندادى. قاۋلى زاڭدى كۇشىنە ەندى»، - دەيدى ج. جۇماتايەۆا.
