الماتىدا رەسپۋبليكالىق جەدەل-قۇتقارۋ جاساعى جوعالعان تۋريستەردى تاۋىپ الدى
2- قاراشادا 09:55 مينۋتتا رەسپۋبليكالىق جەدەل-قۇتقارۋ جاساعىنىڭ كەزەكشى-ديسپەتچەرلىك قىزمەتىنە جوعالعان ازاماتتىڭ جۇبايىنان قوڭىراۋ كەلىپ ءتۇستى. اقپاراتتى العان ساتتەن باستاپ، جاساقتىڭ 1 تەحنيكاسى جانە 6 قۇتقارۋشىدان تۇراتىن جەدەل توبى كىشى الماتى شاتقالىنا قاراي بەت الدى، دەپ حابارلايدى ق ر ءى ءى د ت ج ك باسپا ءسوز قىزمەتىنەن.
قۇتقارۋشىلار توبى جولدىڭ ناشار جانە تەحنيكانىڭ ءوتۋى قيىن بولعاندىقتان تەحنيكانى جانە 1 قۇتقارۋشىنى ر ج ق ج- نىڭ جەدەل كەزەكشىلىگىمەن بايلانىسقا شىعۋ ءۇشىن قالدىرىپ، ارى قاراي جاياۋ بارۋلارىنا تۋرا كەلدى. جوعارىعا شىعۋ كەزىندە «ت-1» اۋدانىندا قۇتقارۋشىلار جولدان كەزدەسكەن تۋريستەردەن سۇراستىرىپ جانە سول ايماقتا ورنالاسقان عيماراتتاردى ىزدەستىردى. «ق ا ز سەلدەن قورعاۋ» ستانتسياسى مىڭجىلقى شاتقالى اۋدانىندا جوعالعان تۋريستەر تۋرالى اقپارات راستالمادى. سونىمەن قاتار «ت-1» اۋدانى ءجىتى تەكسەرىلىپ، وسى اۋماقتان جوعالعان ادامداردىڭ ورنالاسقان ىزدەرى تابىلمادى.
كەشكە قاراي ر ج ق ج- نىڭ كەزەكشى بولىمىنە ءوتىنىش بەرۋشى ايەلدەن تۋريستەردىڭ بايلانىسقا شىققاندىعى تۋرالى قوڭىراۋ كەلىپ ءتۇستى. اۋا تەمپەراتۋراسىنىڭ تومەندەۋىنەن، قويۋ تۋمان سالدارىنان، كورۋ قاشىقتىعى 10 مەتردەن اسپاي جانە وزدەرىنىڭ تاۋعا شىققان جولدارىنان اداسىپ كەتكەن. كەلىپ تۇسكەن اقپاراتقا سايكەس، ولاردىڭ قۇمبەلسۋ شاتقالىندا ەكەندىگى انىقتالدى. ۋاقىتتى ۇنەمدەۋ ماقساتىندا 6 قۇتقارۋشىدان تۇراتىن ەكىنشى جەدەل توپتى جانە ءبىر تەحنيكانى ىزدەستىرۋ ورنىنا جىبەرىلدى.
قۇتقارۋشىلار توبى از ۋاقىت ىشىندە اۋداندا ورنالاسقان «الپيسكايا روزا» دەمالۋ ورتالىعىنا ىزدەستىرۋگە كىرىستى. تاۋعا شىعۋ جانە ىزدەستىرۋ جۇمىستارى اۋا رايىنىڭ قولايسىزدىعىمەن جانە كۇننىڭ قارايۋىنا بايلانىستى قيىنداي ءتۇستى.
جوعالعان ازاماتتار ءتۇن جارىمىندا تابىلدى. ازاماتتار قاتتى شارشاعان جانە توڭىپ قالعان. ر ج ق ج جەدەل قۇتقارۋ توبى ۋاقىتتى سوزباي كومەك كورسەتتى. ازاماتتار مەديتسينالىق كومەكتەن باس تارتتى. تاڭعى 6 لاردا زارداپ شەككەندەر قالاعا جەتكىزىلدى. قۇتقارۋ وپەراتسياسى 20 ساعاتتاي ۋاقىتتى الدى. جەكە قۇرامنان 12 ادام جانە 2 تەحنيكا جۇمىلدىرىلدى. ر ج ق ج قىزمەتكەرلەرى 3 ادامدى قۇتقاردى.
