قازاقستان ۇلتتىق بانكى دوللار باعامىنىڭ كوتەرىلۋىنە قاتىستى تۇسىنىك بەردى

استانا. قازاقپارات - ۇلتتىق بانك رەزەرۆتەردى ساقتاۋ ءۇشىن ءوزىنىڭ ىشكى ۆاليۋتا نارىعىنا قاتىسۋىن قىسقارتادى، - دەپ حابارلايدى بانكتىڭ باسپا ءسوز قىزمەتى.

باسپا ءسوز قىزمەتىنىڭ مالىمەتىنشە، ۇلتتىق بانك 2015 -جىلى قىركۇيەك جانە قازان ايلارىندا بيىل 20 -تامىزدا جاريالاعان تەڭگەنىڭ ەركىن وزگەرمەلى باعامىنا ءوتۋ تاسىلىنەن الشاقتاپ، ۆاليۋتا نارىعىندا ۆاليۋتانى ساتۋعا كىرىستى. ۇلتتىق بانكتىڭ ۆاليۋتا نارىعىنا قاتىسۋ ۇلەسى 60 پايىزعا جەتتى. وسى كەزەڭدە ۇلتتىق قور قاراجاتىنىڭ جانە ۇلتتىق بانكتىڭ التىن ۆاليۋتا اكتيۆتەرىنىڭ ەسەبىنەن 5 ميلليارد دوللاردان استام ۆاليۋتا ساتىلدى.

«ۇلتتىق بانكتىڭ جانە ۇلتتىق قوردىڭ التىن ۆاليۋتا اكتيۆتەرىن ساقتاۋ ماقساتىندا ۇلتتىق بانك 2015 -جىلعى 5 -قاراشادان باستاپ ءوزىنىڭ ۆاليۋتا نارىعىنا قاتىسۋىن بارىنشا ازايتۋ تۋرالى شەشىم قابىلدادى. بۇل ۇلتتىق بانكتىڭ ەركىن باعامدى قالىپتاستىرۋ جانە ينفلياتسيالىق تارگەتتەۋگە ءوتۋ جونىندەگى بۇرىن جاريا ەتىلگەن ساياساتىنا سايكەس كەلەدى»، - دەلىنگەن بانكتىڭ حابارلاماسىندا.

باسپا ءسوز قىزمەتىنىڭ مالىمەتتەرى بويىنشا، 5 -قاراشادا تەڭگەنىڭ دوللارعا قاتىستى ايىرباستاۋ باعامىنىڭ نومينالدى وزگەرۋى وتكەن كۇندەگى ءماننىڭ 5 پايىزىن قۇرادى.

«بۇل وزگەرىس قارجىلىق تۇراقتىلىق ءۇشىن قاۋىپ توندىرمەيدى جانە ۇلتتىق بانكتىڭ باعا تۇراقتىلىعىنا قول جەتكىزۋ ماقساتىنا قايشى كەلمەيدى. ۇلتتىق بانك ءوزىنىڭ سۇرانىس پەن ۇسىنىستىڭ اراقاتىناسىن جانە ىرگەلى فاكتورلاردىڭ قولدانىلۋىن كورسەتپەيتىن باعامنىڭ ەداۋىر اۋىتقۋىن رەتتەۋ قۇقىعىن ساقتايدى. تەڭگەنىڭ ايىرباستاۋ باعامىنىڭ بۇدان بىلايعى سەرپىنى نەگىزىنەن الەمدىك قارجى جانە تاۋار نارىقتارىنداعى باعا احۋالىنىڭ سەرپىنىمەن ايقىندالاتىن فاكتورلاردىڭ اسەرىنەن قالىپتاساتىن بولادى»، - دەپ حابارلادى باسپا ءسوز قىزمەتىندەگىلەر.

ايتا كەتەيىك، ۇلتتىق بانكتىڭ اقشا-كرەديت ساياساتى بويىنشا بۇرىن جاريالانعان، 2015 -جىلعى 6 -قاراشاعا جوسپارلانعان وتىرىسى اۋىستىرىلدى، بانكتەگىلەر ونىڭ وتكىزىلۋ كۇنىن قوسىمشا حابارلاۋعا ۋەدە بەردى. ال ەلىمىزدەگى اقشا ايىرباستاۋ ورىندارىندا دوللار باعامى 300 تەڭگەدەن استى.

 

Tengrinews.kz