سەناتورلار «ورالمان» تەرمينىنە قاتىستى ماسەلەنى تاعى كوتەردى
«وسى «ورالمان» تەرمينىنىڭ توڭىرەگىندە ۇلكەن تالاستار بار. بۇعان دا كوزقاراستى وزگەرتەتىن كەز كەلدى.
اتامەكەنىنە ورالىپ وتىرعاندار سول مەملەكەتتە تۋعان ازاماتتار، ال قازاقستاننان كەتكەندەر ولاردىڭ اتا- بابالارى بولاتىن. ەگەر بۇرىن كەتكەندەر بولسا، سولار قايتا كەلسە، ولاردى «ورالمان» دەپ اتاۋعا بولاتىن ەدى. ال قازىرگى كەلىپ جاتقاندار نەگىزىنەن قىتايدىڭ، وزبەكستاننىڭ، موڭعوليانىڭ، تۇركيانىڭ ازاماتتارى، ولاردى، شەت ەلدەگى ەتنيكالىق قازاقتاردى «ورالمان» دەۋ قيسىنسىز، ولاردى قازاقستانعا قونىس اۋدارۋشى ەتنيكالىق قانداستار دەگەن ءجون سەكىلدى»، دەيدى سەناتور جابال ەرعاليەۆ.
ەسكە سالساق، جاقىندا زاڭ جوباسى سەنات كوميتەتىندە تالقىلانعاندا دەپۋتات يكرام ادىربەكوۆ «ورالمان» تەرمينىن قايتا قاراۋدى ۇسىنعان بولاتىن. «ەگەر بىزدە ءبىر ۇعىم، قانداي دا تەرمين پايدا بولسا، سوعان اياعىنا دەيىن بايلانىپ قالامىز. قازىرگى كۇنى بىزدە «ورالمان» تەرمينىنىڭ ءوزى ءبىرشاما كەرى تۇسىنىك تۋدىرىپ ءجۇر. ازاماتتىق العاندار وزدەرىنىڭ مارتەبەسىن اۋىستىرىپ، «ورالمان» مارتەبەسىنەن ايىرىلادى دەپ جاتىر - بۇعان كەلىسپەيمىن. ويتكەنى، باسىنان باستاپ وعان «ورالمان» دەگەندىكتەن ول اۋىلداستارى ءۇشىن دە، سول ءوڭىر ءۇشىن دە ورالمان بولىپ قالا بەرەدى. نەگە ۋاقىتىندا دۇرىس تەرمين قابىلدانباعان، ماسەلەن «باۋىرلاس» ، «وتانداس» سەكىلدى؟ بۇگىنگى ۇدەرىستى ەسكەرە وتىرىپ، بۇل تەرميندى قايتا قاراستىرۋ كەرەك دەپ ويلايمىن. سول قانداستارىمىزدىڭ وزدەرىن قاتىستىرا وتىرىپ تالقىلاساق، ءبىز بۇدان الدەقايدا لايىقتى تەرمين تابا الامىز دەپ سەنەمىن»، - دەگەن ەدى سەناتور.
اۆتور: قانات مامەتقازى ۇلى
