پارلامەنت ورالمانداردىڭ تاريحي وتانىنا ورالۋىن ىنتالاندىراتىن زاڭدى قابىلدادى

 استانا. قازاقپارات - بۇگىن پارلامەنت سەناتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى- قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا تالقىلاپ، قۇجاتتى قابىلدادى.

 ەندى پارلامەنت قابىلداعان قۇجات مەملەكەت باسشىسىنىڭ قول قويۋىنا جولدانادى.

اتالعان زاڭدا ەتنيكالىق قازاقتاردى تاريحي وتانىنا ورالۋىن ىنتالاندىرۋ ماقساتىندا ولاردىڭ قونىستانۋ وڭىرىنە قاراماستان ورالمان مارتەبەسىن الۋ، شەتەلدىك ازاماتتارعا قاراعاندا تولەم قابىلەتىن راستاۋسىز ۋاقىتشا تۇرۋ ىقتيارحاتىن الۋ مۇمكىندىگى بەرىلەدى. بۇل رەتتە ۇكىمەت بەلگىلەگەن وڭىرلەرگە قونىستانعان جاعدايدا ورالماندارعا جاعدايلار جاسالادى. ماسەلەن، جۇمىسپەن قامتۋ بويىنشا شارالار شەڭبەرىندەگى ەتنيكالىق قازاقتار ءۇشىن كولىك شىعىندارىن وتەيتىن، قىزمەتتىك باسپانا نەمەسە جاتاقحانادان بولمە بەرۋدى قۇرايتىن الەۋمەتتىك كومەكتەر قامتىلماق.

بۇنداي الەۋمەتتىك كومەكتەر ەلىمىزدىڭ ءبىر وڭىرىنەن ۇكىمەت ايقىنداعان ەكىنشى وڭىرىنە قونىستانعان ورالماندار ءۇشىن دە بەرىلەدى. ال العاشقى قونىستانعان، ياعني ۇكىمەت ايقىنداعان وڭىرىنەن بەس جىل مەرزىمىنەن بۇرىن ءوز بەتىنشە كوشىپ- قونىپ، قونىس اۋدارىپ كەتكەندەر، قازاقستان رەسپۋبليكاسىنىڭ ازاماتتىعىن الۋدان باس تارتقاندار وزدەرى العان مەملەكەتتىك قولداۋلاردى قايتاراتىن بولادى. سونىمەن قاتار، ورالماندارعا قازاقستان رەسپۋبليكاسىنىڭ ازاماتتىعىن بەرۋ مەرزىمىن تۇراقتى تۇرۋ ىقتيارحاتىن العاننان كەيىن ءبىر جىل ىشىندە شەشۋ كوزدەلەدى.

 تۇتاستاي العاندا، قابىلدانعان زاڭ ىشكى ەڭبەك نارىعىن قورعاۋ، حالىقارالىق مىندەتتەمەلەرگە سايكەس بىلىكتى شەتەلدىك مامانداردىڭ ەركىن نارىعىن قۇرۋ، ەتنيكالىق قازاقتاردىڭ تاريحي وتانىنا ورالۋىن ىنتالاندىرۋ ماقساتىندا كوشى- قون ۇدەرىسىن ۇتىمدى رەتتەۋگە باعىتتالادى.

 «ماسەلەن، بۇل رەتتە ەلىمىزدىڭ سولتۇستىك وڭىرلەرىندەگى جوعارۋ وقۋ ورىندارىنا، كوللەدجدەرگە جاستاردى وقىتۋ ءۇشىن ارنايى گرانتتار ەنگىزىلەدى. شەتەلدىكتەرگە ونىڭ ىشىندە قازاقستان اۋماعىندا تۇراتىن ورالماندارعا ەلدەن شىقپاي ۆيزانى سوزدىرۋ ماسەلەلەرى دە قارالىپ وتىر. وسى ساناتتاعىلارعا تۇراقتى تۇرۋعا رۇقسات بەرۋلەر نەگىزدەمەلەرى جەڭىلدەتىلگەن. سونىمەن قاتار، قازاقستاننىڭ جوعارى وقۋ ورىندارىندا وقيتىن ەتنيكالىق قازاقتارعا ازاماتتىق الۋ ءتارتىبى دە جەڭىلدەتىلىپ وتىر»، - دەدى قۇجاتقا قاتىستى بايانداعان سەناتور ءلاززات قيىنوۆ.

 پارلامەنت قابىلداعان زاڭ ەلباسىنىڭ قول قويۋىنا جولدانادى.

اۆتور: قانات مامەتقازى ۇلى