جوشى حان مازارى جايلى نە بىلەسىز؟
«شىڭعىس حاننىڭ ۇلكەن ۇلى جوشى حاننىڭ كەزىندە وسى جەردە ورداسى بولعان. جوشى حان 1227-جىلى قايتىس بولسا، 1228-جىلى حاننىڭ قول استىنداعى ازاماتتار، سول جەردەگى ەلدى مەكەندەردىڭ ادامدارى وسى مازاردى تۇرعىزعان. الكەي مارعۇلان - وسى جوشى حاننىڭ مازارىن ەڭ ءبىرىنشى زەرتتەگەن ارحەولوگ.
ول كىسى بۇل جەردەن حاننىڭ سۇيەگى تابىلادى ما دەپ كەلىپ زەرتتەگەن. ىشىندە ءبىر ەمەس، ءبىر ۇلكەن ادامنىڭ، سوسىن ءبىر كىشىرەك ءمايىتتىڭ ورىندارىن كورۋگە بولادى. كەيبىر دەرەكتەردە وندا جوشى حاننىڭ جيەنى، ياعني كۇيەۋبالاسىنىڭ كىشكەنتاي قىزى جەرلەنگەن دەيدى.
1998-جىلى ورازاق سماعۇلوۆ ءوزى كەلىپ زەرتتەگەن كەزدە، بىردەن «بۇل قىز بالا» دەدى. 1998-2000-جىلدار ارالىعىندا جۇرگىزىلگەن تاريحي-ارحەولوگيالىق قازبا جۇمىستارىنىڭ ناتيجەسىندە ار جاعىندا جوشى حاننىڭ ورداسى تابىلعان. دەگەنمەن، ەشكىم ناقتى وسى جەردە جوشى حان جاتىر دەپ ايتقان جوق»، - دەپ مالىمدەدى تاريحشى، ولكەتانۋشى ءلاززات كۇنەدىلوۆا.
جوشى حان مازارى - جەزقازعان قالاسىنان سولتۇستىك شىعىسقا قاراي 45 كيلومەتر جەردە، كەڭگىر وزەنىنىڭ سول جاعالاۋىندا، وردا بازار قالاسىنىڭ ىرگەسىندە ورنالاسقان ورتاعاسىرلىق ەسكەرتكىش.
ول ХІІІ-ХІV عاسىرلارعا جاتادى. كۇمبەزدە ساقتالعان تاڭبالارعا قاراعاندا، ونى سالۋعا جوشى ۇلىسىنا قاراعان بارلىق تايپالار (نايمان، قىپشاق، قاڭلى، ارعىن، كەرەي جانە ت. ب) قاتىسقان. اڭىز بويىنشا، جوشىنى اڭ اۋلاپ جۇرگەندە قۇلان شايناپ ولتىرگەن جانە وسى قۇلاندار ولتىرىلگەن جەر بەس قۇلان دەپ اتالىپ كەتكەن.
قىمبات ەلتاي قىزى،
فوتو ازامات اليەۆ
