جۇرت اۋدان اكىمدەرىنىڭ بەتىن قىزارتتى
جولدا كەلە جاتىپ كەز كەلگەن اۋىلعا كولىگىنىڭ باسىن بۇرىپ، كەز كەلگەن اداممەن سويلەسە كەتەتىن باسشىنى اقتوبەلىكتەر بۇرىن- سوڭدى كورمەگەن ەدى. ونىڭ ۇستىنە، اقتوبە وبلىسىن باسقارعاندار ەل ارالاعاندا اۋدان ورتالىقتارىنا بارۋمەن شەكتەلەتىن ەدى.
كولىكتەن تۇسپەيتىن اكىمدەرگە كوز ۇيرەنىپ قالعاندىقتان با، ەل ادامدارىنا جاياۋ ءجۇرىپ، جاياۋ ارالايتىن اكىمنىڭ ارەكەتى تىم ەرسىلەۋ كورىنگەنى دە راس.
دەگەنمەن، ەل ادامدارى ەلگە سۇيكىمى جوق كەيبىر اۋدان اكىمدەرىنىڭ سىباعاسىن بەردى. ماسەلەن، حرومتاۋ اۋدانىنىڭ اقجار اۋىلىنىڭ جۇرتى ءوز اۋدانىنىڭ باسشىسى ايازباي وسمانعاليەۆتى ءتىپتى جۇزبە- ءجۇز تانىمايتىندىقتارىن اشىق ايتتى. بۇرىن- سوڭدى ايازبايدىڭ قامشىسى ارقالارىنا ايازداي باتقان كوپشىلىك ساپاربايەۆتىڭ كوزىنشە ونىڭ سىباعاسىن بەردى. بىزگە جەتكەن ارىزعا قاراعاندا، .... اۋداندا وتكىزىلەتىن تەندەرلەردىڭ ءبارىن اشسا الاقانىندا، جۇمسا جۇدىرىعىندا ۇستاعان اكىم حرومتاۋدى ورتاعاسىرلىق فەودالداي ەركىن يەمدەنگەنگە ۇقسايدى.
تالاي قىزمەتكەرلەردىڭ وبالىنا قالعان ا. وسمانعاليەۆتىڭ باي- شونجارلىق قيمىلدارى مۇنىمەن شەكتەلمەسە كەرەك، ول ءتىپتى تۇتاس جايىلىمدىق جەرلەردى جەكەمەنشىگىنە اينالدىرىپ الىپ، ءوزىنىڭ بۇرىنعى جۇرگىزۋشىسىنىڭ اتىنان ويسىلقارا اۋىلىندا شارۋاشىلىق اشىپ، وسى مىڭداعان گەكتار جەرگە اۋىل ادامدارىنىڭ مالىن كىرگىزبەي، جايىلىمدىق جەردى تارىلتقان.
...
ا. وسمانعاليەۆتەن حرومتاۋ اۋدانىنىڭ حالقى قۇتىلا الماي ءجۇر ەكەن. حرومتاۋدى ب. ساپاربايەۆقا مونو- قالا رەتىندە كورسەتكىسى كەلگەن ا. وسمانعاليەۆتىڭ تۇسىندىرمەسىنەن تۇك شىققان جوق. حرومتاۋ ەشقانداي دا مونو- قالاعا ۇقسامايدى، كولىك جولى ناشار، قالادا ءجىبى ءتۇزۋ كوشە جوق، قالانىڭ ساۋلەت قۇرىلىسى دا تالاپقا ساي ەمەس، قالادا ءدوڭ كەن بايىتۋ كومبيناتىنىڭ مادەنيەت ۇيىنەن باسقا كوزگە ىلەر ەشتەڭە دە جوق.
...
« جاس الاش» گازەتى
