تورعاي دالاسىنداعى تىلسىم ورنەكتەر بۇكىل الەمنىڭ نازارىن اۋداردى

استانا. قازاقپارات - تاعى دا بۇكىل الەمنىڭ نازارى قازاق دالاسىنا اۋدى. بۇل جولى جاھاننىڭ قىزىعۋشىلىعىن تۋدىرعان دۇنيە تورعاي ولكەسىنەن تابىلعان تىلسىم ورنەكتەر بولىپ وتىر، دەپ جازدى «ەگەمەن قازاقستان» گازەتى بۇگىنگى سانىندا.

تاياۋدا ا ق ش- تىڭ ناسا عارىش اگەنتتىگى جەرگە ويىلىپ سالىنعان اتالعان گەومەتريالىق دەنەلەردىڭ فوتوسۋرەتتەرىن جاريالادى.

نەگىزى بۇل ورنەكتەردى العاش رەت 2007-جىلى قوستاناي تۇرعىنى دميتري دەي كەزدەيسوق تاۋىپ العان ەدى. ول پيراميدالار تۋرالى فيلم كورىپ، Google Earth باعدارلاماسى ارقىلى ءوز قالاسىنىڭ ماڭىنان سونداي تاريحي جادىگەرلەردى ىزدەگەن. ناتيجەسىندە، تورعاي دالاسىنداعى تۇسىنىكسىز سۋرەتتەردىڭ ۇستىنەن ءتۇستى.

بۇگىندە Turgay Discovery جوباسىنىڭ جەتەكشىسى د. دەي وسى سالاعا ءبىرجولا بەت بۇرعان. ونىڭ ايتۋىنشا، قازىرگە دەيىن 260 گەوگليف تابىلعان ەكەن. ولاردىڭ اراسىندا تەمىر داۋىرىنە جانە عۇن-سارمات كەزەڭىنە تيەسىلى ورنەكتەر دە بار. ال ەڭ ەجەلگىلەرى بولىپ سانالاتىن الىپ شارشى مەن ايقىش وسىدان 8 مىڭ جىل بۇرىن پايدا بولعان.

- ءبىز 2012-جىلى وسىنداي 19 نىساندى زەرتتەپ، 14 ءىنىڭ جانىنان نەوليت ءداۋىرى كەزىندە قولدانىلعان كونە بۇيىمداردى تاپتىق. مەنىڭشە، بۇل سۋرەتتەردىڭ پەرۋدەگى اتاقتى چانكيلو ورنەكتەرىمەن بايلانىسى بار. سەبەبى، ەكى جاقتا دا گەوگليفتەردى اڭشىلاردىڭ جان-جانۋاردىڭ ماۋسىمدىق كوشۋىن باقىلاۋعا قولدانعانى بەلگىلى بولىپ وتىر، - دەيدى زەرتتەۋشى.

سونىمەن قاتار، ول 14 مىڭ جىل بۇرىن سول كەزدەگى اڭشىلار امەريكاعا وڭتۇستىك ءسىبىر ارقىلى كەتكەنىن نازارعا الدى. سوعان وراي ول گەوگليف ءداستۇرىنىڭ ءبىر تارماعى تورعاي دالاسىمەن تىعىز بايلانىستى دەپ سانايدى.

- وسىدان 7-8 مىڭ جىل بۇرىن بولعان تابيعات اپاتىنان تورعاي جازىعىن ارالدىڭ تۇزدى سۋى باسىپ قالعان. ءدال وسى كەزەڭدە ازيا مەن بالقان تۇبەگىندە كۇنگە تابىنۋ مادەنيەتى باستاۋ العانى بەلگىلى. كەيىن ول مىسىر ارقىلى بۇكىل ەۋروپاعا تارادى. گەنەتيك مامانداردىڭ پايىمداۋىنشا، بۇگىنگى R1b گاپلو توبى سول كەزدە پايدا بولعان. بۇل گەن قازىرگى باتىس ەۋروپا حالىقتارىنىڭ 60 پايىزىنا ءتان. ءتىپتى، يرلانديا، شوتلانديا جانە ۋەلس سىندى ەلدەردىڭ تۇرعىندارىندا 90 پايىزعا دەيىن كەزدەسەدى. تۋتانحامون پەرعاۋىن مەن ۇلى بريتانيانىڭ كورول وتباسى دا وسى توپتىڭ وكىلدەرى ەكەندىگى ايتىلىپ ءجۇر. ەگەر مەنىڭ بولجامىم دۇرىس بولسا، ەۋروپالىق وركەنيەتتىڭ ءتۇپ-تامىرى قازاق دالاسىندا جاتىر، - دەيدى د. دەي.

قازىرگى تاڭدا تورعايداعى تىلسىم ورنەكتەر - الەمنىڭ كوپتەگەن ءىرى وقۋ ورىندارىندا ءجيى تالقىلاناتىن تاقىرىپتاردىڭ ءبىرى. بىرنەشە فۋتبول الاڭىنىڭ اۋماعىن الىپ جاتقان گەوگليفتەر ور، قورعان جانە دۋالدار كەشەنىنەن قۇرالعان. كەيبىر زەرتتەۋشىلەر ولاردى كۇننىڭ قوزعالىسىن تاۋلىك بويى باقىلاۋ ءۇشىن سالىنعان دەپ جورامالداپ وتىر.