استانادا «شابىت» فەستيۆالى اشىلدى - كەسكىن

استانا. قازاقپارات - بۇگىن استانادا «شابىت» حالىقارالىق شىعارماشىلىق جاستار فەستيۆالى سالتاناتتى تۇردە اشىلدى. بيىل 18- مارتە ۇيىمداستىرىلىپ وتىرعان بايقاۋدا باعىن سىناۋعا 388 ۇمىتكەر نيەت بىلدىرگەن.

ولاردىڭ ونەرىن ءوزىمىزدىڭ جانە قىتاي، گەرمانيا، يزرايل، يتاليا، بەلارۋس، رەسەيدەن كەلگەن تانىمال مايتالماندار باعالايتىن بولادى.

باس جۇلدە يەگەرىنە 250 مىڭ، التىن مەدال العان كونكۋرسانتقا 200 مىڭ، كۇمىس جۇلدە 150 جانە قولا جۇلدە يەگەرلەرىنە 100 مىڭ تەڭگەدەن تابىستالادى.

بايقاۋ اياسىندا قازىلار القاسى قاتىسۋشىلار ونەرىن «دومبىرامەن ءان سالۋ»، «دومبىرا»، «سيرك ونەرى»، «اكادەميالىق ءان سالۋ»، «ۇزدىك سكريپكاشى» سىندى اتالىمدار بويىنشا باعالايدى، دەپ حابارلايدى 24.kz.

سونداي-اق بيىل فەستيۆال باعدارلاماسىنا «سپورتتىق بال ءبيى» جاڭا اتالىمى ەنگىزىلدى.

- كۇيشى رەتىندە كۇي قورىمدى كوبەيتە الامىن. جالپى بايقاۋ ەرەجەسىندە 15 كۇي بار. ياعني رەپەرتۋارىما 15 كۇي قوسىلادى، - دەيدى فەستيۆال قاتىسۋشىسى ەرجان توتەيەۆ.