ەگيپەتتەگى ۇشاق اپاتىنىڭ سەبەبى ءالى انىقتالعان جوق

استانا. قازاقپارات -  مىسىردىڭ سيناي تۇبەگىندە قۇلاعان رەسەي ۇشاعىنىڭ قيراۋ سەبەپتەرى ءالى انىقتالۋدا. قارالعان ءارتۇرلى نۇسقالار قاتارىندا ۇشاق بورتىنا جارىلعىش زات قويىلعان دەگەن بولجام دا بار.

 الايدا ناقتى جاۋاپ ۇشاقتان الىنعان قارا جاشىكتى تەكسەرىلگەن سوڭ بەلگىلى بولادى. «ول ءۇشىن بىرنەشە اپتا قاجەت»، - دەيدى ساراپشىلار.

سيناي تۇبەگىندەگى ۇشاق قۇلاعان ايماقتا رەسەي ساراپشىلارىمەن قاتار، وزگە ەل ماماندارى دا زەرتتەۋ جۇمىستارىن جالعاستىرۋدا. قۇتقارۋشىلارعا جەرگىلىكتى اسكەريلەر جاردەم بەرۋدە. مۇنداعى ماماندار ءۇشىن ءاربىر بولشەكتىڭ ماڭىزى زور. ساربازدار ءار ادىمىن ساناپ باسىپ، اۋماقتى تۇگەل تىنتۋدە. ۇشاق بولشەكتەرى 20 شارشى شاقىرىم ايماققا تۇسكەن. ال ساراپشىلار قۇلاعان ۇشاقتىڭ قارا جاشىگىندەگى قۇپيانى انىقتاۋعا كىرىسىپ كەتكەن.

سەرگەي كيرپيچەنكو، رەسەيدىڭ ەگيپەتتەگى ەلشىسى:

 - ءبىراق بۇل جۇمىستاردى باستاعانىمىزعا ءبىر كۇن عانا بولدى. ءىستىڭ سوڭىنا جەتۋ ءۇشىن بىرنەشە اپتا قاجەت. ويتكەنى بۇل     - ناقتىلىق پەن دالدىكتى قاجەت ەتەتىن كۇردەلى ءىس. شەشىم شىعارۋدا اسىعۋدىڭ قاجەتى جوق.

 قارا جاشىكتەگى مالىمەتتەردى بىلمەيىنشە، ماماندار ۇشاق اپاتىنا قاتىستى قانداي دا ءبىر بايلام جاساي المايدى. ونىسى تۇسىنىكتى دە. دەسە دە ۇشاق اپاتىنا سىرتقى كۇشتەردىڭ اسەرى بولۋى مۇمكىن دەگەن نۇسقا دا جوققا شىعارىلمايدى. ەسكە سالا كەتەيىك، سول قارالى كۇنى يراك پەن ليەۆانت لاڭكەستىك ۇيىمى ءىستى ءوز موينىنا العان بولاتىن. الايدا مۇنى دالەلدەيتىن ەشقانداي ايعاق بولعان جوق.

ابدەل فاتتاح اس- سيسي، ەگيپەت پرەزيدەنتى:

 - لاڭكەستەردىڭ «ۇشاق ءبىزدىڭ شابۋىلىمىزدان قۇلادى» دەگەن مالىمدەمەسى   - وزدەرىنە ناسيحات جاساپ، مىسىر تۇراقتىلىعىنا نۇقسان كەلتىرۋ ءۇشىن جاسالعان ارەكەت. ەلدىڭ بۇل بولىگى ءبىزدىڭ مۇقيات باقىلاۋىمىزدا بولعانىن قاداپ ايتامىن.

 ال «كوگالىماۆيا» باسشىلارى بولسا، ۇشاق كوكتە بولعاندا قانداي دا ءبىر مەحانيكالىق اسەردىڭ بولعانىنا سەنىمدى. كومپانيا تەحنيكالىق اقاۋ مەن ەكيپاج مۇشەلەرىنىڭ قاتەلىك جىبەرۋى مۇمكىن ەمەس دەپ وتىر. ءوز كەزەگىندە امەريكالىق باقىلاۋ- ساراپتامالىق اگەنتتىگى ۇشاق بورتىندا جارىلعىش زاتتىڭ بولۋى مۇمكىن دەگەن بولجام ايتۋدا. الايدا زەرتتەۋ جۇمىستارى بۇل نۇسقالاردىڭ ەشقايسىسىن دا راستاي الماي وتىر.

بۇل ۋاقىتتا مارقۇمداردىڭ ءمايىتى سالىنعان ەكىنشى ۇشاق سانكت پەتەربۋرگكە كەلىپ قوندى. توتەنشە جاعدايلار قىزمەتى وكىلدەرىنىڭ ايتۋىنشا، ءبىر كۇن ىشىندە د ن ك ارقىلى تەك 4 ادامنىڭ عانا كىم ەكەنى انىقتالعان.

www.24.kz