بۇگىن استانادا «شابىت» فەستيۆالى باستالادى
بيىل دارىندىلاردى انىقتايتىن بەدەلدى كونكۋرسقا ارنايى ديپلوم، مەدال، لاۋرەات اتاعىن الۋعا، جانە ەڭ باستىسى ەل پرەزيدەنتىنىڭ كۋبوگى يەگەرى اتانۋعا 388 ۇمىتكەر قاتىسادى.
سونىمەن قاتار، باس جۇلدەگەر يەسى 250 مىڭ تەڭگەنى الىپ كەتەدى. التىن مەدال يەگەرلەرى 200 مىڭ تەڭگەدەن، كۇمىس جۇلدە - 150 مىڭ تەڭگە جانە قولا جۇلدە يەگەرلەرى - 100 مىڭ تەڭگەدەن الادى.
- جىل سايىن «شابىت» جاستار شىعارماشىلىق فەستيۆالىنە قىزىعۋشىلىق ارتا تۇسۋدە. بۇنى بايقاۋعا نيەت بىلدىرگەندەردىڭ سانىنان بىلۋگە بولادى. ءار ۋاقىتتا قازىلار القاسى فەستيۆال جاڭا تالانتتى تابۋعا ءارى ولاردىڭ ونەر جولىن اشۋدا سەپتىگىن تيگىزەتىنىن اتاپ وتەدى.
اقپاراتتىق قولداۋدى «حابار» تەلەارناسى كورسەتىپ، ارنادان فەستيۆالدىڭ كۇندەلىكتەرىن كورۋگە بولادى. بيىلعى جىلى جاڭا اتالىم «سپورتتىق بال ءبيىن» ەنگىزدىك، - دەدى استانا قالاسى مادەنيەت باسقارمانىڭ باسشىسى بولات ماجاعۇلوۆ.
كونكۋرسانتتاردىڭ تالانتىن اتاقتى ارتىستەر، پروفەسسورلار، قىتاي، گەرمانيا، يزرايل، يتاليا، بەلارۋس، رەسەي جانە قازاقستاننان شىققان الەمگە تانىمال ونەر مايتالماندارى باعالايتىن بولادى. سونىمەن قاتار، ءادىلقازى القاسىنىڭ مۇشەلەرى شەبەرلىكتەرىمەن بولىسەدى.
وسىلايشا، «دومبىرامەن ءان سالۋ» اتالىمىندا ءادىلقازى القاسىن ق ا ز ك س ر حالىق ءارتىسى، ق ر مەملەكەتتىك سىيلىعىنىڭ لاۋرەاتى، پروفەسسور قايرات بايبوسىنوۆ باسقارىپ وتىر. حالىقتىق ءان سالۋ بويىنشا رامازان ستامعازيەۆ، ايگۇل قوسانوۆا، ساكەن سىزدىقوۆ، جاقسىگەلدى كەمالوۆ جانە قونىسباي ءابىل سىندى تانىمال شەبەرلەر ءوز باعالارىن بەرەدى.
«دومبىرا» اتالىمىندا ءادىلقازى ءتوراعاسى ق ر ەڭبەك سىڭىرگەن قايراتكەرى، پروفەسسور، مەملەكەتتىك اكادەميالىق فيلارمونياسىنىڭ قازاق حالىق اسپاپتارى وركەسترىنىڭ كوركەمدىك جەتەكشىسى جانە باس ديريجەرى ايتقالي جايىموۆ.
سيرك ونەرىن تانىستىراتىن ۇمىرتكەرلەردى استانا سيركى ديرەكتورى ەرىك جولجاقسىنوۆ، ساحا رەسپۋبليكاسى سيركىنىڭ ديرەكتورى سەرگەي راستورگۋيەۆ، الماتى قالالىق قازاق سيركىنىڭ ديرەكتورى داۋلەت دوسباتىروۆ سىندى ونەر تارلاندارى باعالايدى.
«اكادەميالىق ءان سالۋ» اتالىمىندا ءادىل-قازىلار القاسىنىڭ ءتوراعاسى قازاق ۇلتتىق ونەر ۋنيۆەرسيتەتىنىڭ پروفەسسورى قانات وماربايەۆ بولادى. سونىمەن قاتار، حالىقارالىق كونكۋرستاردىڭ لاۋرەاتى، تۇركيا مەن يتاليانىڭ مەملەكەتتىك وپەراسىنىڭ جەكە ءان سالۋشىسى سەدا ورتاچ، مينسكىدەن كەلگەن ونەرتانۋ دوكتورى ەكاتەرينا دۋلوۆا، يەرۋساليم مۋزىكا اكادەمياسىنىڭ كلارنەت كلاسى بويىنشا پروفەسسورى، يزرايل وپەراسى وركەسترىنىڭ ءبىرىنشى كلارنەتى ميحايل گۋرفينكەل، يەرۋساليم سيمفونيالىق وركەسترىنىڭ باس ديرەكتورى ياير ستەرن سىندى شاقىرىلعان قوناقتار ءادىل قازىلار القاسىنا مۇشە رەتىندە كىردى.
فەستيۆالدىڭ ەڭ ۇزدىك سكريپكاشىسىن قازاق ۇلتىق ونەر ۋنيۆەرسيتەتىنىڭ رەكتورى، قازاقستان ەڭبەك ەرى - ايمان مۇساقوجايەۆا، گ. يساكادزە - شپيلمان (گەرمانيا) مۋزىكالىق اكادەمياسىنىڭ قۇرمەتتى جەتەكشىسى ليانا يساكادزە، ەستونيا مۋزىكا اكادەمياسى مەن حەلسينكي سيبەليۋس اكادەمياسىنىڭ پروفەسسورى ماري تامپەرس- بەزرودنايا جانە تاعى باسقالار انىقتايتىن بولادى.
«شابىت-2015» XVIIІ حالىقارالىق شىعارماشىلىق جاستار فەستيۆالىنىڭ سالتاناتتى اشىلۋ ءراسىمى 2015-جىلدىڭ 3- قاراشا كۇنى ساعات 19:00 دە كونگرەسس-حوللدا وتەدى.
