قاۋىمداستىق مۇشەلەرى ورالماندارمەن كەزدەستى

استانا. قازاقپارات - ق ر دۇنيە ءجۇزى قازاقتارىنىڭ قاۋىمداستىعى اقتوبە وبلىستىق فيليالىنىڭ مۇشەلەرى اۋىل- اۋىلدى ارالاپ، ورالماندارمەن كەزدەسۋ وتكىزدى.

بىرنەشە اۋدانعا ايالداپ، اعايىنداردىڭ ءوتىنىش- ارىزىن تىڭداپ، ولاردى شەشۋدىڭ جولدارىن ىزدەستىردى. بۇل تۋرالى قازاق راديوسىنىڭ اقتوبەدەگى ءتىلشىسى مەيرامگۇل راحات قىزى حابارلادى.

حرومتاۋ اۋدانىنداعى 2011 -جىلى «نۇرلى كوش» باعدارلاماسى بويىنشا بوي كوتەرگەن كوكتاۋ اۋىلى 300 وتباسىنا ارنالعان. سول جىلدارى اۋىلعا سىرتتان كەلگەن 92 شاڭىراق قونىس تويىن تويلادى. 2000 -جىلدارى كوشىپ كەلگەن 20 عا جۋىق ورالمان وتباسىنا دا وسى اۋىلدان پاتەر بۇيىرعان.

ال 300 ءۇيدىڭ قالعانى كەزەكتە تۇرعان جەرگىلىكتى تۇرعىندارعا بەرىلگەن. بۇگىندە كوشتىڭ سوڭىن الا كەلگەن 10 عا جۋىق ورالمان وتباسى باسپانا كەزەگىن كۇتىپ وتىر. تۇرعىندار كەزدەسۋ بارىسىندا جۇمىسقا ورنالاسۋ، باسپانا الۋ ماسەلەلەرىن ءسوز ەتتى. «قازاقيا» قوعامدىق بىرلەستىگىنىڭ ءتوراعاسى بازارباي يمانوۆ ەندى اقتوبەگە كەلەتىن كوش ءۇزىلىپ قالا ما دەگەن كۇدىگىن ايتادى.

ويتكەنى، 2014 -جىلى ءتىزىمىن ۇكىمەت بەلگىلەگەن ورالماندار قونىستاناتىن جەتى وبلىستىڭ قاتارىنا اقتوبە كىرمەي قالعان. «ەلباسى 4 قالانى ميلليوندار قالاسى بولادى دەپ بەلگىلەگەن بولاتىن. سونىڭ ءبىرى - اقتوبە. وبلىس حالقىنىڭ سانىن ورالماندارمەن تولىقتىرماساق، قالايشا ميلليونعا جەتكىزەمىز. سوندىقتان، بۇل ماسەلەنى ەسكەرۋ كەرەك. اقتوبەنى ميلليونەر قالا قىلۋ ءۇشىن اتا جۇرتقا ورالىپ جاتقان اعايىنداردىڭ ءبىر بولىگى ءبىزدىڭ وبلىسقا كەلۋلەرى كەرەك»، - دەيدى بازارباي يمانوۆ. بىرلەستىك ءتوراعاسى بۇل ماسەلەنى وبلىس اكىمى الدىندا كوتەرمەك.

 

Kaznews.kaztrk.kz