سەناتور «ورالمان» تەرمينىنەن باس تارتۋدى ۇسىنادى
ەسكە سالايىق، وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.
«ەگەر بىزدە ءبىر ۇعىم، قانداي دا تەرمين پايدا بولسا، سوعان اياعىنا دەيىن بايلانىپ قالامىز. قازىرگى كۇنى بىزدە «ورالمان» تەرمينىنىڭ ءوزى ءبىرشاما كەرى تۇسىنىك تۋدىرىپ ءجۇر.
ازاماتتىق العاندار وزدەرىنىڭ مارتەبەسىن اۋىستىرىپ، «ورالمان» مارتەبەسىنەن ايىرىلادى دەپ جاتىر - بۇعان كەلىسپەيمىن. ويتكەنى، باسىنان باستاپ وعان «ورالمان» دەگەندىكتەن ول اۋىلداستارى ءۇشىن دە، سول ءوڭىر ءۇشىن دە ورالمان بولىپ قالا بەرەدى»، - دەيدى سەناتور تالقىلاۋ بارىسىندا. وسىعان وراي، دەپۋتات شەتتەن كەلگەن ەتنيكالىق قانداستار عانا ەمەس، ولاردىڭ بالالارى دا «ورالمان» بولىپ وتىرعانىنا دا قىنجىلىس ءبىلدىردى.
«نەگە ۋاقىتىندا دۇرىس تەرمين قابىلدانباعان، ماسەلەن «باۋىرلاس»، «وتانداس» سەكىلدى؟ بۇگىنگى ۇدەرىستى ەسكەرە وتىرىپ، بۇل تەرميندى قايتا قاراستىرۋ كەرەك دەپ ويلايمىن. سول قانداستارىمىزدىڭ وزدەرىن قاتىستىرا وتىرىپ تالقىلاساق، ءبىز بۇدان الدەقايدا لايىقتى تەرمين تابا الامىز دەپ سەنەمىن»، - دەدى ول.
ايتا كەتەيىك، زاڭ جوباسىندا ەتنيكالىق قازاقتاردى تاريحي وتانىنا ورالۋىن ىنتالاندىرۋ شارالارى قاراستىرىلعان. ماسەلەن، وسى ماقساتتا زاڭ جوباسىمەن شەت ەلدەن كەلەتىن ەتنيكالىق قانداستاردىڭ قونىستانۋ وڭىرىنە قاراماستان ورالمان مارتەبەسىن الۋ، شەتەلدىك ازاماتتارعا قاراعاندا تولەم قابىلەتىن راستاۋسىز ۋاقىتشا تۇرۋ ىقتيارحاتىن الۋ مۇمكىندىگى بەرىلەدى.
بۇل رەتتە ۇكىمەت بەلگىلەگەن وڭىرلەرگە قونىستانعان جاعدايدا ورالماندارعا جاعدايلار جاسالادى. ماسەلەن، جۇمىسپەن قامتۋ بويىنشا شارالار شەڭبەرىندەگى ەتنيكالىق قازاقتار ءۇشىن كولىك شىعىندارىن وتەيتىن، قىزمەتتىك باسپانا نەمەسە جاتاقحانادان بولمە بەرۋدى قۇرايتىن الەۋمەتتىك پاكەتتەر قامتىلماق.
بۇنداي الەۋمەتتىك كومەكتەر ەلىمىزدىڭ ءبىر وڭىرىنەن ۇكىمەت ايقىنداعان ەكىنشى وڭىرىنە قونىستانعان ورالماندار ءۇشىن دە بەرىلەدى. ال العاشقى قونىستانعان، ياعني ۇكىمەت ايقىنداعان وڭىرىنەن بەس جىل مەرزىمىنەن بۇرىن ءوز بەتىنشە كوشىپ- قونىپ، قونىس اۋدارىپ كەتكەندەر، قازاقستان رەسپۋبليكاسىنىڭ ازاماتتىعىن الۋدان باس تارتقاندار وزدەرى العان مەملەكەتتىك قولداۋلاردى قايتاراتىن بولادى.
سونىمەن قاتار، ورالماندارعا قازاقستان رەسپۋبليكاسىنىڭ ازاماتتىعىن بەرۋ مەرزىمىن تۇراقتى تۇرۋ ىقتيارحاتىن العاننان كەيىن ءبىر جىل ىشىندە شەشۋ كوزدەلەدى.
تالقىلاۋدان سوڭ كوميتەت دەپۋتاتتارى زاڭ جوباسىن جالپى وتىرىسقا شىعارۋ تۋرالى ۋاعدالاستى.
اۆتور: قانات مامەتقازى ۇلى
