ۇلتتىق بانكتى ەكى جىل باسقارعان قايرات كەلىمبەتوۆ نەسىمەن ەستە قالدى؟
وسى مەرزىمدە ەكى مارتە تەڭگەنى قۇلدىراتقان باس بانكير حالىقتىڭ ماڭداي تەرىمەن جينالعان زەينەتاقى قورىنا دا قول سالۋىمەن ەرەكشە ەستە قالادى.
وسىدان سوڭ، ارادا اي وتپەي باس بانكير قىزمەتتەن بوسادى. اقپانداعى «اقشا قۇنسىزدانۋىن ۇيقىدان تۇرىپ ەستىدىم» دەگەن ءسوزى كەلىمبەتوۆتىڭ حالىق اراسىندا تانىمالدىعىن ارتتىردى.
الەۋمەتتىك جەلىنى ءدۇر سىلكىندىرگەن، قىزۋ تالقىلاۋعا ۇشىراعان ول بيىلعى تامىز ايىنداعى قۇنسىزدانۋدى دا بايقاماي قالدى.
ۇلتتىق بانك ءتوراعالىعىنا كەلگەلى تەك ۋادە بەرۋدەن جالىقپاعان قايرات نەمات ۇلى حالىقتىڭ ابدەن كەلەمەجىنە دە ۇشىرادى. ءتۇرلى دەموتيۆاتورلاردى كوڭىل كوتەرۋ قۇرالى دەپ قابىلداعان ول، قانشا ساتسىزدىككە ۇرىنسا دا ءوز ەركىمەن ورىن بوساتپادى. ءتىپتى، حالىق سىنى ءوز الدىنا، دەپۋتاتتاردان دا اۋىر سوزدەر ەستىپ ءجۇردى.
«ءسىز حالىققا عانا ەمەس، رەسمي ورگان، قازاقستان رەسپۋبليكاسىنىڭ سەناتىنا دا جالعان سويلەپ شاتاستىردىڭىز. ءسىزدى كەزىندە تاعايىنداۋعا كەلىسىم بەرگەن ەدىك. ەندى پارلامەنتكە قاي بەتىڭىزبەن كەلدىڭىز. ءسوزىڭىزدىڭ قۇنى قالعان جوق. بۇدان كەيىن سىزگە قالاي سەنۋگە بولادى؟ مەنىڭشە، ءسىزدىڭ كاسىبي بىلىكتىلىگىڭىزدە نە ەتيكاڭىزدا پروبلەما بار»، - دەدى سەناتور سۆەتلانا جالماعامبەتوۆا.
ەكى جىل بۇرىن ۇلتتىق بانككە باسشى بولىپ تاعايىندالعان كەلىمبەتوۆكە كەي ساراپشى ماماندار ونىڭ قارجى سالاسىندا تاجىريبەسى جوقتىعىن ايتىپ سەنىمسىزدىك بىلدىرگەن. ال باس بانكير رەتىندە قىزمەتى ۇزدىكسىز سىناۋ مەن ءسات سايىن ساتسىزدىككە تولى بولعان كەلىمبەتوۆ ءار كەز جىميىپ قانا قۇتىلاتىن.
وعان قوسا، ءار قۇنسىزدانۋدان كەيىنگى دوللارعا شاققانداعى تەڭگەنىڭ تۇراقسىز باعامىن ۇنەمى ەل ەكونوميكاسى ءۇشىن وڭتايلى دەپ ەسەپتەيتىن. ال مىناۋ كەلىمبەتوۆتىڭ ۇلتتىق ۆاليۋتا ءۇشىن جاسالعان سوڭعى ساۋەگەيلىگى ەدى.
«ەگەر مۇناي باعاسى ارزانداپ، كورشىلەس ەلدەردىڭ ەكونوميكاسى قۇلدىراسا، ءبىز دايىنبىز. بۇعان دەيىن قابىلدانعان ۆاليۋتانى ەركىن اينالىمعا جىبەرگەننىڭ ارقاسىندا حالىققا قاتتى سەزىلە قويماس دەپ ويلايمىز. ال مۇناي باعاسى قايتادان وسسە، تەڭگەنىڭ ءباسى ارتىپ، ءبارىن قۋانتاتىنى ارتىق»، - دەدى ۇلتتىق بانكتىڭ بۇرىنعى باسشىسى قايرات كەلىمبەتوۆ.
سول قۋانىشتى كۇتپەي ءتوراعالىقتان كەتكەن كەلىمبەتوۆ زەينەتاقى قورىنا دا قول سالىپ، حالىقتىڭ جيعان قارجىسىن ەكىنشى دەڭگەيلى بانكتەرگە ۇلەستىرىپ بەردى. جارتى تريلليوننان استام قارجىنى تاراتىپ بەرگەن قايرات مىرزا سالماقتى قالپىن ساقتاپ، ەلدى دە سابىرعا شاقىرعان ەدى.
دەرەككوز: 31-كانال
