مىسىقتىڭ دا الۋان ءتۇرى بار

استانا. قازاقپارات - كوزدەرى اسپانداعى ايداي تولىسىپ، بىرەسە جىڭىشكەرىپ وتىراتىن تابيعاتتىڭ تىلسىم جاراتىلىسى سانالاتىن مىسىقتار تۋرالى اڭگىمە قوزعاۋدىڭ ءوزى قىزىق.

الماتىدا وتكەن كەربەز مىسىقتار كورمەسىندە سونداي كەرەمەتتەرگە كۋا بولدىق.

كورمەگە كەربەز مىسىقتاردىڭ 18 ءتۇرى قويىلدى. كەيبىر دەرەكتەرگە سۇيەنسەك، الەمدە ءۇي مىسىقتارىنىڭ 256 ءتۇرى كەزدەسەدى ەكەن. كورمەگە كەلۋشىلەر وتە ايگىلى جانە وتە سيرەك كەزدەسەتىن مىسىق تۇرلەرىن كورۋگە مۇمكىندىك الدى.

شارا اياسىندا كورمەگە قاتىسۋشىلاردىڭ مىسىقتارىنا ارنالعان جارىستار ۇيىمداستىرىلىپ، ساراپشىلار جەڭىمپازداردى انىقتادى. ولارعا ۇيىمداستىرۋشىلار تاراپىنان ءتۇرلى سىي- سياپاتتار بەرىلىپ، ديپلومدارمەن ماراپاتتالىپ، كۋبوك تابىستالدى.

ماسەلەن، اسىراندى مىسىقتىڭ ارعى تەگى ليۆيالىق مىسىق بولىپ سانالادى، ونى افريكا تۇرعىندارى بۇدان 5 مىڭ جىل بۇرىن قولعا ۇيرەتكەن. قولعا ۇيرەتىلگەن باسقا جانۋارلارعا قاراعاندا، مىسىق ارعى تەگىنەن ونشا وزگەرە قويماعان، سوندىقتان مىسىقتىڭ قولتۇقىمدارى كوپ ەمەس.

حالقىمىزدا: «پايعامبارىمىزدىڭ ءوزى ەتەگىندە ۇيىقتاپ قالعان مىسىقتى وياتپاي، شاپانىنىڭ ەتەگىن ويىپ تاستاپ كەتكەن ەكەن» دەگەن اڭىز كەزدەسەدى. سونداي-اق مىسىقتاردىڭ ادامعا بەرەر ەمدىك قاسيەتتەرى بار. ەگەر ادامنىڭ ءبىر جەرى اۋىرسا، سول جەرگە مىسىقتى جاتقىزا قويسا، اۋرۋ ساپ تىيىلادى. ال ولارعا اياۋسىزدىقپەن قاراعان ادام ونىڭ قارعىسىنا ۇشىراپ، وڭبايتىنى دا راس دەگەن سەنىم قالىپتاسقان.

«ايقىن»