حايۋاناتتار باعىندا جولبارىستى سيپاماق بولعان ايەل قولىنان ايىرىلا جازدادى

استانا. قازاقپارات - امەريكانىڭ نەبراسكا شتاتىنىڭ حايۋاناتتار باعىندا تورعا كىرىپ، جولبارىستى سيپاعىسى كەلگەن ايەلدى جىرتقىش تالاپ تاستادى.

33 جاستاعى جاكلين ەيد حەللوۋين كۇنى Omaha's Henry Doorly Zoo حايۋاناتتار باعىنا كۇزەتشىلەرگە بىلدىرتپەي كىرىپ كەتتى. سول كەزدە ايەلدى   جىرتقىش ونىڭ قولىنان تىستەپ الدى. دارىگەرلەر اۋرۋحاناعا جەتكىزىلگەن ەيدتىڭ قاتتى جارالانعان ساۋساقتارىن ساقتاپ قالدى.

«اۋرۋحانادا ەيد قىزمەتكەرلەرمەن دورەكى سويلەسكەن. ول ماس نەمەسە ەسىرتكىگە ەلتىگەن بولۋى مۇمكىن»، - دەپ ناقتىلادى پوليتسيانىڭ وكىلدەرى. ولار حايۋاناتتار باعىنا جاكلينمەن بىرگە تاعى ءبىر ادام كىرگەنىن، ءبىراق، جولبارىستىڭ تورىنا كىرمەگەنىن قوسىپ ايتتى.

حايۋاناتتار باعىنىڭ اتقارۋشى ديرەكتورى دەننيس پەيت وسى وقيعادان كەيىن مەكەمە باسشىلىعى قاۋىپسىزدىك شارالارىن كۇشەيتكەنىن حابارلادى: اۋماقتى جارىقتاندىرۋ جاقسارتىلىپ، باقىلاۋ تاسپالارىنىڭ سانى كوبەيتىلگەن، ال زووباق كىرەبەرىستەرىنە كومپيۋتەرلەندىرىلگەن قۇلىپتار سالىندى، دەپ جازادى لەنتا. رۋ.