ادالبەك احمادي. بابامنىڭ باسى
1996 -جىلى قازاقستانعا ءبىرجولا قونىس اۋدارعان. العاشقى شىعارمالارى 1993 -جىلى شىڭجاڭدا «ۇكىلى ىرعاي» اتتى تاڭدامالى جيناقتا جىرلارى جارىق كورگەن. 1997، 1998 -جىلدارى وتكىزىلگەن دۇنيەجۇزى قازاقتارىنىڭ جىر ءمۇشايرالارىنىڭ، 2003 -جىلى وتكەن ماحامبەت وتەمىس ۇلىنىڭ رەسپۋبليكالىق تەلەجىر بايگەسىنىڭ جۇلدەگەرى.
«شولپان ءالى تۋعان جوق» جىر جيناعىنىڭ اۆتورى.
بابامنىڭ باسى
مۇڭعا تولى ءبىر ءاندى شىرقاپ قانا،
كۇرسىنەدى كوڭىلسىز سىرقات دالا.
قۋراپ قالعان بابامنىڭ باس سۇيەگىن،
دوپ قىپ تەۋىپ بارادى ءبىر توپ بالا.
دوپ قىپ تەۋىپ بارادى اقىماقتار،
قايعى جۇتىپ قالعيدى اتىراپتار.
جاسىن توگىپ جىلاپ تۇر، ەڭىرەپ تۇر،
تەرەكتەردە سارعايعان جاپىراقتار.
باستى اپارار تەپكىلەپ قايدا عانا،
قۇلازىعان قارايمىن اينالاما.
توزعان جاسى شىعا الماي جانارىمنىڭ،
جۇرەگىمە بەرىش بوپ بايلاناما؟!
اي ارۋدى قالقالاپ قارا قىراۋ،
قارا ءتۇندى جامىلعان دالا مىناۋ.
دەپ تۇرعانداي ۇلى تاۋ ماعان قاراپ،
ەزدىك قىلىپ ەزىلمە قاراعىم-اۋ.
گۇلدەي قۋراپ مەن تۇرمىن بەلەستەگى،
كوڭىلىمنىڭ كوگىنەن جەل ەسپەدى.
نەگە ەكەنىن بىلمەيمىن قۋراعان باس،
ماحامبەتتىڭ باسى بوپ ەلەستەدى.
وزەگىمدى اق جالىن كەتتى كەرىپ،
ۇلى تاۋعا تۇرعاندا بەتتى بەرىپ.
باباتايدىڭ دوپ بولىپ باس سۇيەگى،
دومالاپ ءجۇر اپىراي تەپكىلەنىپ.
جان ەدىم عوي ومىردەن وت تىلەگەن،
قايدا الىستاپ سول جىگەر كەتتى مەنەن.
ءجۇرىپ الدى توپ بالا قارا تۇندە،
التىن باسىن بابامنىڭ تەپكىلەگەن.
قايدا مەنىڭ ايباتىم، باتىلدىعىم،
قايدا مەنىڭ قايراتىم، باتىرلىعىم.
جۇرەگىمدى كەمىرىپ جاتىر مۇڭىم،
قايدا ءجۇرسىڭ، قايداسىڭ اقىندىعىم.
قاراي قالىپ ۇمىتپەن انا جاسقا،
قىيال كەشىپ مەن تۇردىم الا قاشپا.
تىك كوتەرىپ بابامنىڭ باس سۇيەگىن،
پەرىپ كەتتى - اۋ مەڭىرەۋ قار تاسقا.
پەرىپ كەتتى ءۇزىلدى-اۋ عاسىر ءانى،
عاسىر ءانى حالىقتىڭ اسىل ءانى.
بىت-شىت بولدى بابامنىڭ باس سۇيەگى،
بىت-شىت بولىپ جان-جاققا شاشىرادى.
ويلاماي -اق سول كۇندە ءوز كۇنىمدى،
باتىلدىققا جەڭدىرىپ ەزدىگىمدى.
باسىن الىپ بالانىڭ تاستايىن دەپ،
قولىما الدىم سۋىرىپ كەزدىگىمدى.
قۇشاقتاستىم مەن سولاي كۇيىكپەنەن،
بەرەدى ەكەن باتىرلىعىڭ كۇيىكتى ەرەن.
قوس قولىمنىڭ جۋماستان قىزىل قانىن،
باس سۇيەگىن بابامنىڭ جيىپ كەلەم.
