قازاقستان كينو نارىعىنىڭ قازىرگى جاعدايى
ەلىمىزدە كينو كورۋگە قۇمار جاندار جىل ساناپ وسۋدە. ستاتيستيكاعا سۇيەنسەك، وتكەن جىلى 12 ميلليوننان اسا ادام كينوتەاترعا بارعان. جالپى قازاقستاندا فيلم تۇسىرۋمەن 31 كينوستۋديا اينالىسادى. بىلتىر وتاندىق رەجيسسەرلەر 347 كينونى جارىققا شىعاردى. ولاردىڭ باسىم بولىگى - قىسقامەتراجدى فيلمدەر. 11 كوركەم تۋىندى جانە 67 دەرەكتى فيلم كورەرمەن نازارىنا ۇسىنىلدى. ءبىز «24 KZ» - تىڭ ينستاگرامداعى رەسمي پاراقشاسىندا كينوسۇيەر قاۋىمنان ەلىمىزدە تۇسىرىلگەن قانداي ءتول تۋىندىنى بىلەسىز؟» دەگەن ساۋال جولداعان ەدىك.
ءبىراق جاۋاپ كوڭىل كونشىتپەدى. حالىق اراسىندا كەڭ تانىلعان 2-3 شىعارما عانا اتالدى. ماماندار بار ماسەلە جارنامانىڭ جوقتىعىندا دەپ وتىر.
اندرەي مانۋيلوۆ، «Сhaplin cinema» كينوتەاترلار جەلىسىنىڭ PR- مەنەدجەرى:
- مۇندا قازاقستاندىق كينولاردى كەمسىتىپ، تومەندەتۋ دەگەن جوق. ەگەر گولليۆۋدتا تۇسىرىلگەن تۋىندىنىڭ كوپشىلىك كوڭىلىنەن شىعاتىنىنا كۇمان كەلتىرسەك، وندا وعان و باستا كوپ ءۇمىت ارتپايمىز. سايكەسىنشە، وعان بولىنەتىن سەانستىڭ سانى دا از بولادى. سوندىقتان كينونىڭ قايدان ەكەنى ماڭىزدى ەمەس. بۇل ەرەجە امەريكا، رەسەي، ەۋروپا مەن قازاقستانعا ورتاق.
اسقار بيسەمبيننىڭ كومەدياسى «كاسسالىق كينو» بولدى دەپ ايتۋعا تولىق نەگىز بار. پرەمەرانى حالىققا پاش ەتۋدىڭ الدىندا تىڭ تۋىندى جان-جاقتى جارنامالاندى. ناتيجەسىندە فيلم ءوز- ءوزىن اقتاپ، وعان جۇمسالعان 300 مىڭ دوللاردىڭ ورنى تولدى. الايدا كينويندۋستريادا تولاعاي تابىسقا جەتۋ جەڭىل ەمەس دەپ وتىر ماماندار.
اسقار بيسەمبين، رەجيسسەر:
- كوپكە توپىراق شاشپايمىن. ءبىراق بۇل سالادا باقىلاۋ جوق. سوندىقتان كينونى قاداعالايتىن ارنايى زاڭ كەرەك. سوندا وتاندىق ءوندىرۋشىنىڭ قۇقىعى مەن مىندەتى ايقىندالا تۇسەدى. ايتپەسە بيۋدجەتى ميلليوندى قۇرايتىن، تانىمال اكتەرلار وينايتىن باتىستىق كينولاردى ءبىزدىڭ قازاقستاندىق تۋىندىلار باسىپ وزا الماسى حاق.
كينوعا قاتاڭ باقىلاۋ كەرەكتىگىن مادەنيەت جانە سپورت ءمينيسترى ارىستانبەك مۇحامەدي ۇلى دا ۇدايى ايتىپ كەلەدى. بۇگىندە مينيسترلىك تۋىندىنى جالعا الۋعا رۇقسات بەرۋمەن عانا شەكتەلەدى. قارجى ماسەلەسىنە ارالاسپايدى. بۇل سالاداعى تۇيىتكىلدەردى شەشۋ ءۇشىن اتالعان ۆەدومستۆو ارنايى زاڭ ازىرلەۋدى كوزدەپ وتىر. الايدا قۇجاتتىڭ قاشان دايىن بولاتىنى ازىرگە بەلگىسىز.
www.24.kz
