نۇرعيسا تىلەنديەۆ جايلى كوركەم فيلم جىل سوڭىنا دەيىن ەكرانعا شىعادى - فوتو

الماتى. قازاقپارات - الماتىدا قازاقتىڭ ۇلى كومپوزيتورى، اتاقتى ديريجەر، شەبەر دومبىراشى نۇرعيسا تىلەنديەۆتىڭ ءومىرى مەن شىعارماشىلىعىنا ارنالعان كوپ سەريالىق كوركەم فيلم ءتۇسىرىلىپ جاتىر.

«كورەرمەن كەمەڭگەر مۋزىكانتتى بۇل فيلمدە ءار قىرىنان تانيتىن بولادى. نۇرعيسا تىلەندى ۇلى الدىنا قويعان ماقساتتارىنا جەتە بىلەتىن، قاتال مىنەزدى، قىزۋ قاندى، قام كوڭىل ءارى وتە سەزىمتال جان بولعان. بۇل فيلمدە نۇرعيسا اعامىزدىڭ ءومىرى، قىزىعى مەن شىجىعى مول تاعدىرى، الدىنا قويعان بيىك ماقساتتارىنا قول جەتكىزۋ جولىندا كورگەن قيىندىقتارى شىنايى تۇردە باياندالادى»، - دەيدى فيلمنىڭ اۆتورلارى.

فيلمنىڭ قويۋشى رەجيسسەرى - ءراشيد سۇلەيمەنوۆ. باستى رولدەردى ەرگەنباي ءابۋوۆ، گۇلناز جولانوۆا، سانجار ماديەۆ، باقىتجان الپەيىسوۆ، ميحايل توكاريەۆ، ساعىزباي قارابالين، ماحاببات سارقىتبايەۆا، يانا بوبرىكا سىندى ارتىستەر سومدايدى.

«بۇل فيلمگە ءتۇسىرىلىپ جاتقان كەزدىڭ وزىندە جۇرتشىلىق نازارى ەرەكشە اۋىپ جاتىر. ال كاستينگ جاريالانعان كەزدە ءتىپتى تۇنگى ساعات بىرگە دەيىن تەلەفونعا تىنىم بولمادى. كوپ ادام تۇسكىسى كەلدى. مۇندا كەيىپكەرلەر قازاق تىلىندە دە ورىس تىلىندە دە سويلەي بەرەدى. سوندىقتان دا ول قازاق ءتىلدى كورەرمەندەرگە دە ورىس ءتىلدى كورەرمەندەرگە دە تۇسىنىكتى»، - دەدى ءوز كەزەگىندە «كوركەم فيلم» كينو كومپانياسىنىڭ PR- ديرەكتور ساكەن بەلگىبايەۆ.

سونىمەن قاتار، ول باستى ءرولدى سومداۋعا ۇمىتكەرلەر وتە كوپ بولعاندىعىن ايتتى. ءبىراق ولاردىڭ ەسىمدەرى ازىرگە قۇپيا ساقتالۋدا.

ءتۇسىرىلىم بۇدان ءۇش اپتا بۇرىن باستالدى. قازىر ءتۇسىرۋ جۇمىستارى جامبىل اتىنداعى قازاق مەملەكەتتىك فيلارمونياسىندا جالعاسۋدا. كۇنى بۇگىنگە دەيىن تۋىندىنىڭ جارتىسىنان كوبىسى ءتۇسىرىلىپ قويىپتى.

فيلمدى «حابار» اگەنتتىگىنىڭ تاپسىرىسىمەن «كوركەم فيلم» كينوكومپانياسى ءتۇسىرىپ جاتىر. وعان قاجەتتى اقپاراتتار سوڭعى بەس اي بويى جيناقتالعان. ونىڭ ۇستىنە ستسەناريي كومپوزيتوردىڭ جانۇياسىمەن، تۋىستارىمەن كەلىسىلگەن.

ەندى كورەرمەندەر ءار سەرياسى 52 مينۋتتان تۇراتىن «قۇستار ءانى» كوركەم فيلمىن بيىلعى جىلدىڭ سوڭىنا تامان كوگىلدىر ەكراننان تاماشالاي الادى.

اۆتور: جاپپاربەرگەن ايبوتا