قولىنا قامشى ۇستاعان قاريا كەلدى
- قازاق جىلاندى دا قادىر تۇتاتىنىن بىلەسىڭدەر عوي، - دەدى ول كىرگەن بويدا، - جىلاننىڭ ۋى مىڭ دا ءبىر اۋرۋعا ەم. مىنا قامشىنى سوندىقتان دا جىلان بەينەسىندە جاساعاندى ءجون كوردىم. «الماتى اقشامىنىڭ» جۋرناليستەرىنە ارنايى جاساعان سىيلىعىم بۇل. ۇستىڭگى جاعىندا قاناتىمەن سۋ تاسىپ، ۇشىپ كەلە جاتقان قارلىعاشتىڭ بەينەسى بار، مىنە!
ءبىر جاعىنان قانجارعا دا ۇقسايتىن قامشىنى ءبىر تاماشالاپ الدىق. «جۋرناليستەرىڭىز تاۋىپ جازادى، ءبىلىپ جازادى. گازەتتىڭ ءتىلى دە ۋمەن تەڭ - مايدا دا ءتاتتى ءارى اشى، وقىرماننىڭ جاندۇنيەسىن ساۋىقتىرىپ، جاقسارتۋعا ەم بولا بەرسىن دەگەن تىلەكتەن تۋدى بۇل دۇنيەم» ، - دەيدى قاريا.
كەزەك ەكىنشى قامشىعا كەلگەندە، اقساقال از- كەم ويلانىپ الدى دا، توقتاماستان سويلەي جونەلدى.
- مىنا قامشىدا تۇنىپ تۇرعان فيلوسوفيا جاتىر. تۇسىنىكتىرەك بولۋ ءۇشىن، مەن ونى قاراپايىم تىلمەن ايتىپ بەرەيىن. الدىمەن، بۇل قامشىنى قالي سارسەنبايعا ارناپ ادەيى جاسادىم. ونىڭ جازعان- سىزعاندارىن قالت جىبەرمەي، وقىپ تۇرامىن. اڭعارمايتىنى جوق، بايقامايتىنى كەمدە- كەم، تۋرا قيىپ تۇسەتىن قىراعى قىرعيداي. سوندىقتان، قامشى سابىنىڭ مىنا شەتىن بۇركىتتىڭ باسىنا ۇقساتىپ جاسادىم. ال، ەندى ەكىنشى جاعىن تۇلپاردىڭ باسىنا ۇقساتىپ ىستەدىم. قالەكەڭنىڭ قالامى ودان سايىن جۇيرىك بولا ءتۇسسىن دەگەن تىلەك مۇنىم.
وتكەندە وسى «اقشامنان» قاليدىڭ «جۋرناليستىڭ جۇرەگى» دەگەن ماقالاسىن وقىدىم. قاتتى ۇنادى. شىنىندا دا، جۋرناليستىڭ جۇرەگىنە بار اۋىرتپالىقتىڭ سالماعى تۇسەدى. ءبارىن ەكشەپ- تەكشەپ، تارازىلاپ، جۇرەگىنەن وتكىزىپ وتىراتىندىقتان، سولاي بولادى. قامشى سابىنىڭ ورتاسىندا ءىلۋلى تۇرعان جۇرەك وسى - جۋرناليستىڭ جۇرەگى. مەن كوپ بايقاپ كەلەمىن، باس رەداكتورلارىڭىز ءوزىنىڭ ماقالالارىندا شەراعاڭنىڭ - شەرحان مۇرتازانىڭ «جۋرناليستىڭ ارقالاعانى - التىن، جەگەنى - جانتاق» دەگەن ءسوزىن كوپ كەلتىرىپ جاتادى. قامشىداعى جۇرەك استىندا تۇرعان ەكى دومالاقتىڭ بىرەۋى سول - التىن، ەكىنشىسى - جانتاعى... ونىڭ استىندا جايقالىپ تۇرعان قوس جاپىراق الداعى ۋاقىتتا جايناپ، جاساي بەرسىن دەگەن نيەتتەن تۋدى، - دەدى تولەش ستانبەكوۆ كوكەمىز.
وسى ۋاقىتقا دەيىن قانشاما قامشى كورىپ ءجۇرمىز، ءدال وسىنداي استارلى ويلار قوسا ورىلگەن قامشىنى ءبىرىنشى رەت كەزدەستىرىپ وتىرعانىمىزدى جاسىرا المادىق. ونىڭ ۇستىنە، ەكى قامشىنى دا اقساقال ءوز قولىمەن ءورىپ، جاساپ شىققان. «گازەتتەرىڭىزدى ۇيگە جازدىرىپ الىپ تۇرامىن. الداعى جىلعا دا مىندەتتى تۇردە جازىلامىن» ، - دەپ، شىن ۋادەسىن بەرىپ جاتىر تاعى. بىزگە بارىنەن بۇرىن، وقىرمانىمىزدىڭ گازەتىمىز تۋرالى جىلى لەبىزى مەن قولىنان تۋعان قامشىسى قاتتى ۇنادى. وقىرماننىڭ ءبارى وسىنداي بولسا عوي، شىركىن!
انۋاربەك اۋەلبەك
«الماتى اقشامى»
