يزرايل حالقى كىسى قولىنان قازا تاپقان پرەمەر- مينيستر يتسحاك ءرابيندى ەسكە الدى
ونىڭ وسى مالىمدەمەسى ولىمىنە سەبەپ بولدى. ەسكە الۋ شاراسىن ۇيىمداستىرۋشىلار پالەستينا مەن يزرايل اراسىنداعى اۋىر جاعدايدى «ءولىمدى ۇمىتقان جوقپىز، دەموكراتيا ءۇشىن كۇرەسەمىز، وزبىرلىققا، ناسىلشىلدىك پەن ارانداتۋشىلىققا قارسىمىز!» دەگەن ۇرانمەن وتكىزدى.
يتسحاك ءرابيننىڭ قازا تاپقانىنا 20 جىل بولدى. الايدا اراب- يزرايل شيەلەنىسى ءالى شەشىمىن تاپقان جوق. ول يزرايل تاريحىندا وسى شيەلەنىستى بەيبىت جولمەن شەشۋگە كۇش سالعان ادام رەتىندە قالدى. رابين جابىرلەۋ، وزبىرلىق كورسەتۋ ءتاسىلىن قولدانۋ ارقىلى ۇلت تاۋەلسىزدىگى ءۇشىن كۇرەسۋگە بولمايتىندىعىن جاقسى ءتۇسىندى. 1995 -جىلى حالىقتىڭ باسىم بولىگى پالەستينامەن بەيبىت كەلىسىم جاساۋ ونىڭ قولىنان كەلەتىندىگىنە سەندى. وسى ءۇمىتتى ءالى دە ورىندالىپ قالادى دەگەن سەنىمدەگىلەر قۇربان بولعان پرەمەردى ەسكە الۋ جيىنىندا كوك لەنتا تاقتى.
ورا گامەر، «ايەلدەر بەيبىتشىلىك ءۇشىن» ۇيىمىنىڭ مۇشەسى:
- رابين مەن ءۇشىن ءبىزدىڭ ەلدى قۇتقاراتىن ادام بولاتىن. ول ومىردەن وتكەننەن بەرى مەملەكەتىمىز زورلىق- زومبىلىقتان كوز اشپاي كەلەدى. قاراڭىزدارشى، نە بولىپ جاتقانىن. ۇكىمەت ونىڭ يدەياسىن قولداعاندا، قازىر كوشەگە شىعۋدان قورىقپاۋشى ەدىك.
1995 - جىلى بۇل الاڭ «يزرايل پاتشالارى» دەپ اتالاتىن. ءرابيندى ولتىرەتىن كۇنى نورۆەگيالىق كەلىسىمدى جانە پالەستينامەن بەيبىت كەلىسىم جاساۋدى قولداۋعا مىڭداعان ادام جينالعان ميتينگ ءوتتى. قازىردە جىل سايىن ءرابيندى ەسكە الۋ ءۇشىن جۇزدەگەن ادام وسىندا جينالادى.
كاريم سافۋر، ميتينگكە قاتىسۋشى:
- ءبىز ناسىلشىلدىككە قارسىمىز، بەيبىت ءومىردى قالايمىز. ءبىز ميتينگكە بەكەر كەلگەن جوقپىز. مەن زورلىق- زومبىلىق جويىلىپ، ەكى ۇلتتىڭ كوسەمدەرى بەيبىت كەلىسىمگە كەلسە دەپ قالايمىن. ەشكىمنىڭ سوعىسقىسى كەلمەيدى.
وڭشىل، ۇلتشىل يگال امير ءومىر بويىنا باس بوستاندىعىنان ايىرىلعان. يزرايل پرەمەرىنىڭ قازاسىنا بايلانىستى دەرەكتى فيلم ءتۇسىرىلدى. وندا يگال سۇحباتىندا ارەكەتىنە ەش وكىنبەيتىنىن ايتقان. ءتىپتى وعان ەشكىمنىڭ بوگەت جاساماعانىنا قۋانىشتى ەكەنىن دە جاسىرماپتى. پرەمەردىڭ كۇزەت قىزمەتىنە بىرەۋ تەلەفون شالىپ، قاستاندىق جاسالعالى جاتقانى تۋرالى ايتقان. الايدا وعان ەشكىم كوڭىل بولمەپتى. اقىر اياعىندا پالەستينامەن بەيبىت قاتىناس ورناتۋدى كوزدەگەن مىقتى ساياساتكەر اجال قۇشتى.
ەلي زيۆ، ميتينگكە قاتىسۋشى:
- ول وتە مىقتى ساياساتكەر بولاتىن. قارسى تاراپپەن قالاي سويلەسۋ كەرەكتىگىن جاقسى بىلەتىن. مامىلەگە كەلمەي بەيبىتشىلىك بولمايتىنىن ءبارىمىز جاقسى بىلەمىز. مەن جىل سايىن وسىندا كەلىپ، ول ەكەۋىمىزدىڭ جوعالتقان بەيبىتشىلىگىمىزدى ەسكە الىپ، كوز جاسىما ەرىك بەرەمىن.
www.24.kz
فوتو: txt.newsru.co.il
