الماتىنىڭ قۇپياعا تولى قورقىنىشتى مەكەندەرى - كەسكىن، فوتو
الماتىنىڭ مەدەۋ ماڭىنداعى بيىك توبەدە ورنالاسقان سكيتتى (موناحتار تۇراتىن شاعىن موناستىر) ەكى موناح سەرافيم جانە اناتولي 20- عاسىردا سالعان. ۋسپەن شىركەۋىنە قىزمەت ەتكەن جەراستى شىركەۋى 20- عاسىرلاردا ىلعالدىلىق سالدارىنان تومەن ءتۇسىپ كەتكەن.
مۇندا ارۋاقتار مەكەندەيدى دەگەن سىبىس ەل اراسىندا تاراپ ءجۇر. اقيقاتىنا كوز جەتكىزۋ ءۇشىن سول جەردى كورىپ قايتۋعا توبىمىزعا داستان مۇستافين جانە دجافار ەسىمدى اۋەسقوي ستالكەرلەر دە قوسىلدى.
ستالكەرلەر - ادام ءومىرى ءۇشىن قاۋىپتى، قورقىنىشتى، قاڭىراعان مەكەندەردى ىزدەپ، زەرتتەيتىن اۋەسقويلار توبى. ولار جەلى ارقىلى جينالىپ، تاراپ كەتكەن اڭىزداردىڭ بەتىن اشۋعا تىرىسادى.
تۇرعىندار اراسىندا تاراعان اڭىز بويىنشا، شىركەۋدىڭ نەگىزىن قالاعان سەرافيم جانە اناتوليدى سول جەردە اتىپ كەتكەن. سودان بەرى تىنىم تاپپاي كەلگەن موناحتاردىڭ ارۋاعى جۇرتشىلىقتىڭ ۇرەيىن ۇشىرىپ جۇرەدى دەگەن قاۋەسەت بار.
ستالكەرلەر قاراڭعى ۋاقىتتا قاڭىراعان مەكەننەن ارۋاقتار ىزدەۋدى ۇيرەنىپ قالعاندىقتان، جولعا كەشكى 6 دان كەتە شىقتى.
جولدا دجافاردان ەسىمى تۋرالى سۇراي كەلە، ونىڭ يسلام ءدىنىن قابىلداعان ەتنيكالىق حريستيان ازاماتى ەكەنىن ەستىپ، ءبىر تاڭىرقادىق. شىن ەسىمى جەنيا بولعان 26 جاستاعى ازامات يسلام دىنىنە بەت بۇرىپ، ەسىمىن دجافار ەتىپ وزگەرتكەن ەكەن.
كولىگىندە وتىرعان ساتتە كوزىمىزگە ونىڭ ىلىنگەن تاسبيحى ءتۇسىپ قالىپ، ءدىنىن اۋىستىرعاندى اتا-اناسى قالاي قابىلداعانىن سۇرادىق.
«اتا-انام قاتتى قارسى بولدى. اسىرەسە اكەم. سەبەبى ورىس ۇلتىنان بولعاسىن، ءبارى يسلام ءدىنىن جات ءدىن سانايدى. ءبىراق مەن ءوز قالاۋىمنان باس تارتپادىم»، - دەيدى دجافار.
ول ستالكەرلىككە 17 جاسىنان بەرى قىزىققانىن، ءتىپتى ءبىر رەتتە تۇسىنىكسىز قۇبىلىستىڭ كۋاسى بولعانىن جاسىرمادى.
«مەن 17 جاستا ەدىم. ءبارىمىز كەزەكتى ارۋاق مەكەندەۋى مۇمكىن قاڭىراعان ۇيدە وتىردىق. ءبىر كەزدە تۇسىنىكسىز دىبىستار شىعا باستادى. ءبارىمىز دە جالت بۇرىلعاندا بەلگىسىز قاراڭعى دۇنيەنىڭ ءبىز جاققا قاراي كەلە جاتقانىن كورىپ، جاپا-تارماعاي قاشتىق. مەن، ءتىپتى قورىققاننان ەكىنشى قاباتتان سەكىرىپ ءتۇستىم»، - دەپ ەسىنە الدى ول.
داستان دا سونداي قۇبىلىستىڭ كۋاسى بولعان ەكەن. تىلسىم دۇنيەگە دەگەن ورتاق قىزىعۋشىلىق ستالكەرلەردى وسىلايشا بىرىكتىرگەن بولۋى كەرەك.
قۇرىلىسشىلار بەلگىسىز سەبەپتەرمەن بىرىنەن سوڭ ءبىرى ول جەردەن ات تونىن الا قاشادى.
«مەن تۇسىنىكسىز تىلسىم كۇشتىڭ ارتىمنان كەلىپ، دەمالىپ تۇرعانىن سەزگەنىمدە تۇلا بويىم تۇرشىگىپ كەتكەن بولاتىن. الماتىدا قۇپياعا تولى مەكەندەر جەتكىلىكتى. ماسەلەن قاڭىراعان «قازاقستان» كينوتەاترى. ونى قالپىنا كەلتىرمەك بولعان قۇرىلىسشىلار بەلگىسىز سەبەپتەرمەن بىرىنەن سوڭ ءبىرى ول جەردەن ات تونىن الا قاشقاندارى تۋرالى ەستىگەنىم بار. بىردەڭەدەن قورىققان بولۋى كەرەك. ول جەردە تالايى تۇسىنىكسىز دىبىستار ەستيدى ەكەن»، - دەيدى داستان مۇستافين.
اڭگىمەلەسىپ وتىرىپ دىتتەگەن جەرگە قالاي تەز جەتكەنىمىزدى دە بايقاماي قالدىق. الايدا الدىمىزدان كۇتپەگەن كەدەرگى شىقتى. شىركەۋگە بارار جولدا بيىك توبەنى ورمەلەپ ءوتۋىمىز كەرەك ەكەن.
قولىمىزدا اۋىر فوتواپپارات بولعاسىن، ساپارىمىزدى وسى جەردەن اياقتاپ، شىركەۋگە اپارار جولدى ەستەلىككە ءتۇسىرىپ الۋعا بەل بۋدىق.
الايدا وسى ساتتە ادام سەنگىسىز قۇبىلىستار ورىن الدى. ءبىز الىپ شىققان جاقسى جۇمىس ىستەيتىن فوتواپپارات الگى جولدى قانشا تۇسىرۋگە ارەكەتتەنسەك تە، ىستەن شىعىپ قالدى.
تۇسىنبەي فوتواپپاراتتى باسقا جاققا باعىتتاپ تاعى تۇسىرگەنىمىزدە، ول ادەتتەگىدەي تۇسىرە باستادى.
باسقا جاققا قاراتقاندا تۇسىرىلگەن كادر
قايتادان شىركەۋگە اپارار جولدى 10 شاقتى رەت تۇسىرمەك بولعانىمىزبەن، اپپارات بىردە ءبىر كادردى تۇسىرە الماي قالدى.
باسقا جاققا قاراتقاندا تۇسىرىلگەن كادر
قاسىمىزداعى ەكى ستالكەر دە تاڭىرقاپ قاراپ، ءوز ۇيالى تەلەفوندارىمەن سول جەردى فوتوعا تارتپاق بولدى. الايدا ولاردىڭ تەلەفوندارىنىڭ جارقىلداعى قوسىلماي قويدى.
قۇرىلعىلار سۋىقتان ىستەمەي قالدى دەپ ايتۋعا دا كەلمەيدى. سەبەبى ءبىز شىققان سەنبىنىڭ كەشى جىلى بولاتىن.
داستان قويماستان فوتواپپاراتتى ءوز قولىنا الىپ، ءتۇسىرۋىن توقتاتپادى. اقىرى ءبىر عانا كادر جاسالدى.
جالعىز كادر
سول ساتتە ەشتەڭەدەن تايىنا قويمايتىن داستان مۇستافين ازداپ ۇرەيلەنىپ قالعانىن جاسىرمادى.
«مەن سول كادردى ارەڭ دەگەندە تۇسىرگەندە تۇسىنىكسىز-اق دۇنيەنىڭ قوزعالعانىن بايقاپ قالدىم. سول ساتتە قورقىپ قالماعاندا، تاعى ءبىراز كادرلار جاسايتىن ەدىم»، - دەيدى ول.
قالاي جەتۋگە بولادى: اۆتوبۋس 12, 12 ا، «مەدەۋ» ايالداماسى، شىمبۇلاققا تارتار جولداعى ءبىرىنشى بۇرىلىستان سولعا قاراي ورماننىڭ ىشىندەگى جولمەن قالاعا قاراي كوتەرىلۋ كەرەك.
2. مەدەۋدەگى «ارۋاقتارعا تولى ءۇي»
تۇرعىندار اراسىندا تاراعان قاۋەسەتتەرگە سايكەس، «مەدەۋ» مۇز ايدىنىنىڭ ماڭىنداعى ءۇي مەيرامحانا كەشەنى رەتىندە سالىنۋى كەرەك بولعان.
ەسكەرتپە: ۆيدەودا بەيادەپ سوزدەر مەن كادرلار كەزدەسەدى.
الايدا وعان بىلەك سىبانا كىرىسكەن قۇرىلىسشىلاردىڭ تالايى تۇسىنىكسىز دىبىستار ەستىپ، زارەلەرى ۇشقان. سودان بەرى ەشبىر قۇرىلىسشى جولاعىسى كەلمەيتىن ءۇي قاڭىراپ بوس قالعان.
قاڭىراعان ۇوس گوسپيتالى
بۇل گوسپيتالدى 40-جىلداردىڭ اياعىندا ۇلى وتان سوعىسىنىڭ ارداگەرلەرى مەن مۇگەدەكتەرىنە سالعان. كەيىن بۇل جەردە اۋعانستان ارداگەرلەرى ەم العان.
ەسكەرتپە: ۆيدەودا بەيادەپ سوزدەر كەزدەسەدى
شاتىرىن زاقىمداعان جەر سىلكىنىسىنەن كەيىن ەمحانا قاڭىراپ قالعان. الايدا كوبى عيماراتتىڭ قاڭىراۋىنا جەر سىلكىنىسىنەن وزگە دە سەبەپتەر بولعانىنا سەنەدى.
بۇل جەردە زاتتار ىشىندەگى ادامدار قاشىپ شىققانداي سول كۇيى شاشىلىپ جاتىر. ال قوسىمشا كىرەبەرىس قۇبىجىق كىرىپ كەتەردەي ۇزاق ۋاقىت بويى جابىلعان كۇيدە تۇرعان.
ماتەريالدى ازىرلەۋ كەزىندە ءوز ۆيدەولارىمەن بولىسكەن - داستان مۇستافين.
ماتەريالدى سايتقا دايىنداعان: كۇنسۇلتان وتارباي
