بالعىنبەك يماشەۆ: ايتىستان كاپيتان شەنىندە وتستاۆكاعا كەتىپ بارامىن

استانا. قازاقپارات - بىلتىرعى جىلى «التىن دومبىرانىڭ» يەسى اتانعان ايتىسكەر اقىن بالعىنبەك يماشەۆ جاقىندا ايتىستان كەتەتىنىن مالىمدەگەن ەدى.

وسىعان بايلانىستى اقىن الەۋمەتتىك جەلىدەگى پاراقشاسىندا ايتىسسۇيەر اعايىنعا العىستان باسقا ايتارى جوق ەكەنىن ايتتى.

- ايتىستان كاپيتان شەنىندە وتستاۆكاعا كەتىپ بارامىن. مۇحامەدجان، مەلستەر مايور كەزىندە كەتتى. ەسەنقۇلدار قارا ولەڭنىڭ «قاتارداعى جاۋىنگەرىمىن» دەسە دە اتاعى گەنەرالدارمەن شەندەس ەدى-اۋ.

كەشەگى سۇراپىل سوعىس كەزىندە الماتىدا وتكەن ايتىستى «الاتاۋدان، ارقادان اقىندارىم كەلىپسىڭ»، - دەپ ارناۋ جىرىمەن اشىپ بەرگەن 98 جاستاعى جامبىل جاكەم ايتىس دەگەن الەمنىڭ ارميا گەنەرالدارى ەدى عوي. ايتىسسۇيەر اعايىنعا العىستان باسقا ايتارىم جوق. ايتىس قازاققا عانا ءتان ءتول ونەرىمىز، ونى تومەندەتپەي، تۋىن جەلبىرەتە بەرەتىن ءىنى-قارىنداستارىما بەك سەنەمىن، - دەيدى بالعىنبەك يماشيەۆ.

ءبىز سۇننەت دەپ وسىردىك،

يەكتەگى ساقالدى.

تىلگە شەشەن جاس ۇرپاق.

تولتىرۋدا قاتاردى.

ءۇمىت ەتكەن دوستارىم،

سەندەرگە بەردىم باتامدى!

ايتا كەتەيىك، اقىن بۇل شەشىمىن 21- قازاندا الماتى وبلىسىنىڭ ورتالىعى تالدىقورعان قالاسىندا وتكەن XIX عاسىرداعى جەتىسۋ اقىندارىنىڭ التىن دىڭگەگى، ايتىسكەر اقىن ءسۇيىنباي ارون ۇلىنىڭ 200 جىلدىق مەرەيتويىنا ارنالعان حالىقارالىق اقىندار ايتىسى كەزىندە ايتقان بولاتىن.

اينۇر تۇرسىنبايەۆامەن ايتىسى كەزىندە اقىن ايگىلى «توي جىرى» ءانىنىڭ ماقامىنا سالىپ، ءوز ويىن بىلاي اياقتادى.

زەينەرتكەرلىك ءتاتتى كۇندەر، ءتاتتى كۇندەر!

بۇل ايتىسقا شات كۇلىندەر، شات كۇلىندەر.

وسىمەن مەن كەتەمىن پەنسياعا،

بالعىنبەكتىڭ سوڭعى ايتىسى دەپ بىلىڭدەر، - دەپ قايىرعان بولاتىن.

Baq.kz