قازاقتىڭ قولونەر بۇيىمدارى ءابۋ-دابيدە وتەتىن كورمەگە قويىلماق

استانا. قازاقپارات - قازاقتىڭ تەكەمەتى، كيىز ءۇيى جۇننەن جاسالعان تۇرمىستىق زاتتارى مەن زەرگەرلىك بۇيىمدارى ءابۋ- دابيدە وتەتىن كورمەگە قويىلماق.

15 -قاراشادا باستالىپ، ءبىر ايعا سوزىلاتىن فەستيۆالگە سەگىز مەملەكەت قاتىسپاق. باستى ماقسات - الەم حالىقتارىنىڭ ونەرىن، شىعارماشىلىعىن، قولونەرىن تانىستىرىپ، مادەني ارىپتەستىك ورناتۋ. قازاقستاننان باراتىن 50 دەلەگاتتىڭ قاتارىندا پاۆلودارلىق قولونەر شەبەرى مايسا ىقىلاسوۆا دا بار. ول 30 عا تارتا جەكە تۋىندىسىن اپارا جاتىر.

مايسا ىقىلاسوۆا شىعارماشىلىقپەن اينالىسىپ قانا قويماي ستۋدەنتتەرگە ساباق بەرەدى. شەبەرلىك ساعاتىنا شاكىرتتەرمەن قاتار ۇستازدار قاۋىمى دا قىزىعۋشىلىقپەن قاتىسادى. ستۋدەنتتەر ازىرگە كيىز باسۋدىڭ ەڭ قاراپايىم ءتۇرىن يگەرۋدە. ولار جۇننەن جۇمساق ويىنشىقتار، كادەسىيلار، دەكوراتيۆتى بۇيىمداردى جاسايدى. كەلەشەكتە بۇل كاسىپتى ابدەن مەڭگەرىپ، تابىس كوزىنە اينالدىرۋعا بەل بۋعانداردارى بار.

انار جاعىپاروۆا، س. تورايعىروۆ اتىنداعى پ م ۋ ستۋدەنتى:

- وسى جۇننەن باسۋ تاسىلىمەن جاسالاتىن ويىنشىقتار مەنى قىزىقتىرادى جانە وسى ويىنشىقتارىمدى بيىل «شابىت» فەستيۆالىنە، حالىقارالىق جاستار فەستيۆالىنە دايىنداپ جاتىرمىن. باياعىدا تەكەمەتتى تەك قانا ويۋ-ورنەكپەن اشەكەيلەگەن. مايسا ىقىلاسوۆا كەسكىندەمە تۇرىندە جاساپ وتىر. باعزى زاماننان كەلە جاتقان ۇلتتىق ونەرىمىز ەندى ءابۋ-دابيدە ءبىر ايعا جالعاساتىن قولونەر شەبەرلەرى كورمەسىنىڭ تورىنەن ورىن الىپ، تۋريستەردىڭ نازارىنا ۇسىنىلاتىن بولدى.

مايسا ىقىلاسوۆا، قولونەر شەبەرى:

- ءبىرىنشى رەت باراتىن بولعاندىقتان، وتە ۇلكەن جاۋاپكەرشىلىك جۇكتەلەدى دەپ ايتۋعا بولادى. ءبىز تەك قانا ونەرىمىزدى كورسەتىپ قويمايمىز، بۇكىل قازاقستاننىڭ بەينەسىن كورسەتەمىز. سونىمەن بىرگە بۇكىل وسى قازاق ەلىنىڭ كىم ەكەنىن سول ەلگە تانىستىرۋعا مۇمكىنشىلىگىمىز بولادى.

ۇقساتا بىلگەنگە قويدىڭ بيازى جۇنىنەن كوپ نارسە جاساۋعا مۇمكىندىك بار. «تابيعي ماتەريالدان تۇيمەدەن باستاپ باسپانا تۇرعىزۋعا بولادى»، - دەيدى شەبەر.

www.24.kz