ەكسكليۋزيۆ: «ەير استانا» الەمدەگى ەڭ جاس اۋە پاركتەرىنىڭ ءبىرى جانە وندا سيناي تۇبەگى ارقىلى ۇشاتىن اۋە باعىتتارى جوق

الماتى. قازاقپارات - «ەير استانا» اۋە كومپانياسى تەحنيكالىق اقاۋى بار ۇشاقتى ەشقاشاندا اۋەگە ۇشىرمايدى.

رەسەيدىڭ «كوگالىماۆيا» اۋە كومپانياسىنىڭ Airbus A321 ۇشاعىنىڭ مىسىر جەرىندە اپاتقا ۇشىراۋىنا بايلانىستى بۇگىن «قازاقپارات» تىلشىسىنە بەرگەن سۇحباتىندا «ەير استانا» اۋە كومپانياسىنىڭ مەنەدجەرى تىلەك ءابدىراحيموۆ وسىلاي دەپ جاۋاپ بەردى.

ەستەرىڭىزگە سالا كەتەلىك، 31 -قازان كۇنى رەسەيدىڭ «كوگالىماۆيا» اۋە كومپانياسىنىڭ Airbus A321 ۇشاعى مىسىر جەرىندە اپاتقا ۇشىراعان بولاتىن. سيناي تۇبەگىندەگى شارم- ءال- شەيح قالاسىنان سانكت-پەتەربۋرگكە باعىت العان ۇشپاق كوپ ۇزاماي تۇبەكتىڭ سولتۇستىك اۋماعىندا اپاتقا ۇشىرادى. ۇشاق بورتىنداعى 224 جولاۋشىنىڭ بارلىعى قازا تاپقان. قازىر الدىن- الا بولجامدار بويىنشا ۇشاقتىڭ اپاتقا ۇشىراۋىنا ونىڭ تەحنيكالىق اقاۋى جانە پايدالانۋ مەرزىمىنىڭ ۇزاقتىعى سەبەپ بولۋى مۇمكىن.

وسىعان بايلانىستى، «ەير استانا» اۋە كومپانياسىنىڭ رەسمي وكىلى قازاقستاننان مىسىرعا تىكەلەي اۋە رەيسىنىڭ جوق ەكەندىگىن ءمالىم ەتتى.

«ءبىزدىڭ ۇشاقتار مىسىر باعىتىندا ۇشپايدى. ياعني، سيناي تۇبەگى ارقىلى اۋە باعىتتارى جوق. ءبىز تەك ەۋروپا مەن ازيا ەلدەرىنە عانا ۇشامىز. سولاردىڭ ىشىندە ىستامبۇل، انتاليا، دۋباي، ءابۋ- دابي، دەلي قالالارىن اتاۋعا بولادى»، - دەدى ت. ءابدىراحيموۆ.

 سونىمەن قاتار ول «ەير استانا» اۋە كومپانياسىنىڭ اۋەپاركى الەمدەگى ەڭ جاس پاركتەردىڭ ءبىرى ەكەندىگىن جەتكىزدى.

«ءبىزدىڭ اۋە كومپانيامىز تەحنيكالىق اقاۋى بار ۇشاقتى ەشقاشاندا اۋەگە ۇشىرمايدى. بۇل جولاۋشىلار قاۋىپسىزدىگىنىڭ كەپىلى. ءبىزدىڭ ماماندار ۇشاقتى ۇشىرار الدىندا كەز- كەلگەن جاعدايدا مۇقيات تەكسەرۋدەن وتكىزەدى. نورماتيۆ جانە وندىرۋشىلەردىڭ ۇسىنىستارى بويىنشا تەحنيكالىق تۇرعىدا ساپالى قىزمەت كورسەتەدى. «ەير استانا» اۋە كومپانياسىنىڭ اۋە پاركىندەگى ۇشاقتاردىڭ ورتاشا «جاسى» - بار بولعانى 6 جىل. بۇل الەمدەگى ەڭ جاس اۋە پاركتەرىنىڭ ءبىرى. ال بۇل ءبىز ءۇشىن ماڭىزدى كورسەتكىش»، - دەدى ت. ءابدىراحيموۆ.

اۆتور: جاپپاربەرگەن ايبوتا