تاتارلار التىن وردا تاريحى تۋرالى تەلەحيكايا تۇسىرمەك

استانا. قازاقپارات - 2016 -جىلدىڭ قىركۇيەك- جەلتوقسان ايلارىندا تاتارستاندا التىن وردا تۋرالى تەلەحيكايا تۇسىرىلەدى، دەپ حابارلانعان «نۇر استانا» مەشىتىنىڭ سايتىندا.

كينوتۋىندىدا شولپان حاماتوۆا، رەناتا ليتۆينوۆا، مارات باشاروۆ، فەدور بوندارچۋك، ارتۋر سموليانينوۆ، ەليزاۆەتا بويارسكايا، ماريا ميرونوۆا، يرينا پەگوۆا، الەكساندر بالۋيەۆ، ەۆگەني سىگانوۆ، سونداي-اق يرينا شەيك جانە «گولوس» شوۋىنىڭ العاشقى ماۋسىمىنىڭ جەڭىمپازى دينا گاريپوۆا تاريحي رولدەردى سومداماق.

16 بولىمنەن تۇراتىن جوبانىڭ ءار سەرياسىنىڭ بيۋدجەتى 25 ميلليون رۋبلدى قۇرايدى. بارلىق تۇسىرىلىمگە 400 ميلليون رۋبل جۇمسالماق. دايىندىق جۇمىستارى الداعى جىلدان باستالىپ، نەگىزگى ءتۇسىرىلىم قىركۇيەك-جەلتوقسان ايلارىندا جۇرگىزىلەدى.

تەلەتۋىندى كورەرمەن نازارىنا رەسەي «ءبىرىنشى ارناسىنان» 2017 -جىلدىڭ كۇز- قىس ماۋسىمىندا ۇسىنىلادى.

التىن وردا تاريحىنان سىر شەرتەتىن تەلەحيكايانىڭ 70 پايىزىن تاتارستاننىڭ كورىكتى جەرلەرىندە ءتۇسىرۋ جوسپارلانعان.