جۇمىس تۋرالى ازىلدەر

استانا. قازاقپارات - دۇيسەنبى باستالا سالىسىمەن جۇما كۇنگە تەز جەتۋدى ارماندايتىن ادامدار بار. كەرىسىنشە، مەرزىمدىك دەمالىسقا شىعا سالىسىمەن، جۇمىسىن اڭسايتىن جاندار دا جەتەدى.

ءبارىبىر جۇمىسسىز سەندەلىپ بوس جۇرگەندەرگە قاراعاندا، مۇرنىڭنان شانشىلىپ جاتساڭ دا، تۇك بوس ۋاقىت بولماي، جۇمىس جاساپ جۇرگەنگە ەشتەڭە جەتپەيدى. ال تومەندەگى ءازىل-قالجىڭدى جۇمىسى بار ادامدار جاقسى تۇسىنەدى.

دەمالىس كۇندەرىن جاقسى كورەمىن. سەبەبى، جۇمىسقا كەلەر جولدا كولىك كەپتەلىسى بولماي، تەز جەتەمىن.

قىزىق جىل مەزگىلى كەلدى: تاڭەرتەڭ - ءتۇن، كەش - ءتۇن... ال كۇندىز مەن جۇمىستا بولامىن!

ۇيىقتاۋعا قورقامىن! ويانعان سوڭ قايتادان جۇمىسقا بارۋ قاجەت.

باستىق كەزەكتى دەمالىسقا شىعىپ كەتسە، بارلىق ۇجىم دەمالادى.

اللو، بۇل جەمىس-جيدەكتى تەگىن جەتكىزۋ ورتالىعى ما؟ مەنى جۇمىسقا جەتكىزىپ تاستاڭىزشى، وتىنەمىن!

ماماننىڭ جالاقىسى 10 مىڭ تەڭگە بولسا، جۇمىستا نە ىستەۋى كەرەك؟ ەشتەڭە ىستەمەۋى كەرەك، كەيدە وزگەلەردىڭ جۇيكەسىندە ويناۋىنا بولادى.

ءبىزدىڭ ەلىمىزدە مىناداي جاعداي دا بولىپ تۇرادى: جۇمىستا وتىراسىڭ دا، اقشا تاباتىن جەر قايدا بار ەكەن دەپ ويلايسىڭ.

«ەرەسەك ادام بولعانىم قانداي جاقسى بولدى، ەندى مەكتەپكە بارۋ ءۇشىن ساعات 7  دە ويانبايمىن» دەيمىن مەن ساعات 6 دا جۇمىسقا جينالىپ جاتىپ.

جۇمىستان كەيىن نە ىستەيمىن؟ ۇيگە كەلەم دە اياقتالماعان جۇمىستارىمدى جالعاستىرامىن، تەك كيىمىم ادەمى بولمايدى.

كەي جۇمىس اڭقىعان كوفە يىسىمەن باستالىپ، كوز ءىشى قىزارۋىمەن اياقتالادى.

جۇمىسقا بارعىم كەلمەدى. ءبىراق قاناعاتسىزدىعىم جالقاۋلىعىمدى جەڭدى.

جۇمىستا كۇن سايىن ناركولوگ پەن پسيحياتر تەكسەرۋىنەن وتەمىز. دەنى ساۋ ادام وسىنداي از جالاقى بەرەتىن جۇمىستا قالاي ىستەيدى دەپ كۇمانداناتىن بولار.

massaget.kz