نۇرسۇلتان نازاربايەۆ نەمەرەسى ايسۇلتاننىڭ ق ف ف پرەزيدەنتى بولۋ نيەتىنە قالاي قارايدى؟
بۇل تۋرالى اقوردانىڭ Facebook جەلىسىندەگى پاراقشاسىندا ونلاين-بريفينگتە Tengrinews.kz پورتالىنىڭ ساۋالىنا جاۋاپ بەرگەن مەملەكەت باسشىسى نۇرسۇلتان نازاربايەۆتىڭ باسپا ءسوز حاتشىسى داۋرەن ابايەۆ ءمالىم ەتتى.
«نۇرسۇلتان نازاربايەۆ نەمەرەسى ايسۇلتاننىڭ قازاقستان فۋتبول فەدەراتسياسىنىڭ پرەزيدەنتى بولۋ نيەتىنە قالاي قارايدى؟ مەملەكەت باسشىسى نەمەرەلەرىنىڭ بويىنان جالپى ساياساتقا دەگەن قىزىعۋشىلىقتى بايقاي ما؟» دەگەن ساۋالعا داۋرەن ابايەۆ بىلاي دەپ جاۋاپ بەردى: «مەملەكەت باسشىسى نەمەرەلەرى وزدەرى تاڭداعان كاسىبي جولمەن ءجۇرۋى ءتيىس دەگەن پىكىردى ۇستانىپ وتىر. ارينە، ولاردىڭ ءاربىر جەتىستىگىنە قۋانىشتى، الايدا نەمەرەلەرىنىڭ مانساپ جولىندا قالىپتاسۋىن سىرتتاي باقىلاعاندى ءجون سانايدى.
فۋتبول فەدەراتسياسىنا قاتىستى جاعدايعا كەلسەك، بۇل ءوز شەشىمدەرىن قابىلداۋدا ەشكىمگە تاۋەلدى ەمەس قوعامدىق ۇيىم ەكەنى بەلگىلى. ءارى، ونىڭ الداعى تاعدىرىن ەلدىڭ فۋتبول قاۋىمداستىعىنان باسقا ەشكىم دە ايقىنداي المايدى».
