مەملەكەت باسشىسى: ازاماتتىق-قۇقىقتىق داۋلار جونىندەگى سوتقا پروكۋروردىڭ قاتىناسۋى ازايادى
بۇگىن اقوردادا العاش رەت جاريا تۇردە ەلىمىزدىڭ جاڭا ازاماتتىق پروتسەستىك كودەكسىنە قول قويعان ق ر پرەزيدەنتى نۇرسۇلتان نازاربايەۆ وسىلاي دەدى.
ق ر پرەزيدەنتىنىڭ اتاپ وتۋىنشە، جاڭا ازاماتتىق پروتسەستىك كودەكستە كوپتەگەن ماڭىزدى وزگەرىستەر بار. ونى اقپارات قۇرالدارىنا جاريالاعان كەزدە حالىق وقىپ، تۇسىنەتىن بولادى.
«ماسەلەن، ازاماتتىق-قۇقىقتىق داۋلار جونىندەگى سوتقا پروكۋروردىڭ قاتىناسۋى ازايادى. ءىس جۇرگىزۋدىڭ جەڭىلدەتىلگەن ءتۇرى كەڭىنەن قولدانىلاتىن بولادى. سوتتاردىڭ قاراۋىنداعى ىستەر وڭتايلاندىرىلادى. بۇل جاڭا كودەكس نورمالارىنىڭ بارلىعى سوتتىڭ قورعاۋىنىڭ تيىمدىلىگىن ارتتىرۋعا باعىتتالعان»، - دەدى ەلباسى.
ق ر پرەزيدەنتى جاڭا كودەكسكە قول قويعاننان كەيىن جاقىن ارادا ونىڭ ەلگە تيگىزەر پايداسىن كورە باستايتىندىعىمىزدى باسا ايتتى.
«مۇنان ارى قاراي دا تولىپ جاتقان زاڭدار بار. ولاردىڭ بارلىعىن وزدەرىڭىز بىلەسىزدەر. شىعىپ جاتقان زاڭدار بىزگە وتە قاجەت. اۋىل شارۋاشىلىعىنداعى كووپەراتيۆتىك جۇيەنى ىسكە قوسۋ ماسەلەسى، شاعىن جانە ورتا بيزنەستى قولداۋ ماسەلەسى، تاعى-تاعى دا «100 ناقتى قادامدا» كورسەتىلگەن زاڭنامالاردى قول قويىپ، شىعاراتىن بولامىز. ەلگە قىزمەت ىستەيتىن بولامىز»، - دەدى ن. نازاربايەۆ.
