استانادا ءبىرىڭعاي تولەم قۇجاتى جۇيەسى ەنگىزىلدى

استانا. قازاقپارات - استانادا اعىمداعى جىلدىڭ قازان ايىنان باستاپ ءبىرىڭعاي تولەم قۇجاتى جۇيەسى ەنگىزىلدى.

جاڭا قۇجات «استانا ەنەرگوسبىت» ج ش س مەن «استانا-ەرتس» ج ش س قىزمەتتەرىنىڭ تۇبىرتەكتەرىن بىرىكتىرەدى. قازىرگى زامانعى تولەم جۇيەسى بارلىق كوممۋنالدىق تولەمدەردى ءبىر تۇبىرتەك ارقىلى وتەۋگە مۇمكىندىك بەرەدى، ۋاقىت پەن كوميسسيا شىعىستارىنا قارجىنى ۇنەمدەيدى، دەپ حابارلادى astana.gov.kz.

«استانا ەنەرگوسبىت» ج ش س مەن «استانا-ەرتس» بازالىق مالىمەتتەرىن بىرىكتىرۋ بويىنشا ءبىرقاتار جۇمىستار جۇرگىزىلدى. ءبىر اي كولەمىندە 240 مىڭعا جۋىق دەربەس شوتتار رەتتەلدى، سودان كەيىن ەكىنشى دەڭگەيلى بانكتەردە تولەمدەردى قابىلداۋ قاجەتتىلىگى تۋىندادى.

كوممۋنالدىق قىزمەت ءۇشىن ءبىرىڭعاي تولەم قۇجاتتارىنىڭ بارلىق بانكتەرمەن كەلىسىم-شارتتار جاسالماۋى سالدارىنان «استانا ەنەرگوسبىت» ج ش س كاسسالارىندا كەزەكتەر پايدا بولا باستادى. ءبىراق بۇگىنگى كۇندە بانكتەر شتاتتىق رەجيمدە جۇمىستارىن باستادى جانە تولەم قابىلداۋ جۇيەسى رەتتەلدى دەۋگە تولىق نەگىز بار.

قازىرگى تاڭدا «قازپوشتا» ا ق كاسسالارىندا، «قازاقستان حالىق بانك» كاسسالارى مەن ينتەرنەت-بانكينگتەرىندە، «سەسنا بانك» ا ق، «Kaspi Bank» ا ق، «كازكوممەرتس بانك» ا ق، «ا ت ف بانك» ا ق، سونداي-اق، «Forte Bank»   ا ق ينتەرنەت-بانكينگى ارقىلى تولەمدەر جۇزەگە اسىرىلادى.

سونىمەن قاتار، «قازاقستان بانكارالىق ەسەپ ايىرىسۋ ورتالىعى» «استانا-پلات»، «كاسسا 24» ، «QIWI»  تولەمدەر جۇيەسىنە قول جەتىمدىلىكتى، سونداي-اق، «سبەربانك روسسي»، «بانك سەنتر كرەديت»، «ەكسيم بانك» بانكتەرىنە تولەمدەردى جىبەرۋ مۇمكىندىگى بويىنشا ءوز قىزمەتىن ۇسىندى. 24- قازاننان باستاپ «قازاقستان بانكارالىق ەسەپ ايىرىسۋ ورتالىعى» تولەمدەردى قابىلداي باستادى.

«استانا ەنەرگوسبىت» ج ش س باس ديرەكتورىنىڭ ورىنباسارى داۋرەن قابديننىڭ ايتۋىنشا، ءبىرىڭعاي تولەم قۇجاتى استانا قالاسىندا كورسەتىلەتىن قىزمەتتەردىڭ ساپاسىن كوتەرۋ ماقساتىندا ەنگىزىلدى.

جاڭا كوممۋنالدىق تولەماقى جۇيەسىنىڭ نەگىزگى باسىمدىلىقتارى رەتىندە تولەم جۇرگىزۋدىڭ بىرنەشە جولدارىن اتاپ وتۋگە بولادى. بۇدان بولەك، قازىر بانكتەردە كوممۋنالدىق تولەماقىنى تولەگەندە ءبىر تۇبىرتەك ارقىلى كوميسسيالىق شىعىستاردى ۇنەمدەيدى. بۇل اسىرەسە، زەينەتكەرلەر مەن الەۋمەتتىك جاعدايى تومەن تۇرعىندارعا وتە ماڭىزدى.

- ءبىرىڭعاي تولەم قۇجاتىنىڭ تاعى ءبىر باسىمدىلىعى - قۇجاتتار ەلەكتروندىق تۇردە جەتكىزىلەدى. قازىر ءبىزدىڭ پورتالعا تىركەلگەن تۇتىنۋشىنىڭ ەلەكتروندىق پوشتاسىنا تولەم قۇجاتى جىبەرىلەدى، وسى ارقىلى تۇتىنۋشى تۇبىرتەكتى قاعاز بەتىنە شىعارىپ، ءبىزدىڭ كاسسادا نەمەسە بانكىدە، نە ينتەرنەت ارقىلى تولەي الادى، - دەپ ءسوزىن تولىقتىردى داۋرەن قابدين.

سونىمەن قاتار، كومپانيا الداعى ۋاقىتتا ءبىرىڭعاي تولەم قۇجاتى جۇمىستارىن جەتىلدىرەدى. جۋىردا ءبىرىڭعاي تولەم قۇجاتتارىنىڭ مالىمەت بازاسى egov «ەلەكتروندىق ۇكىمەت» پورتالىمەن بىرىكتىرىلمەك. ايتا كەتەيىك، جاڭا تولەم قۇجاتىنىڭ ەنگىزىلۋىنە وراي تولەۋ مەرزىمى 31- قازانعا دەيىن ۇزارتىلدى.