دزيۋدودان الەم چەمپيونىن وبلىس اكىمى قابىلدادى - فوتو

قىزىلوردا. قازاقپارات - كەشە قىزىلوردا وبلىسىنىڭ اكىمى قىرىمبەك كوشەربايەۆ دزيۋدودان جاستار اراسىندا الەم چەمپيونى ماعجان ءشامشاديندى قابىلدادى.

اكىم جاس سپورتشىنى جەتىستىگىمەن قۇتتىقتاپ، اقشالاي سەرتيفيكات تابىستادى، دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

ەسكە سالا كەتەيىك، قىزىلوردالىق دزيۋدوشى ماعجان شامشادين ۇستىمىزدەگى جىلدىڭ 24-27- قازان ارالىعىندا بىرىككەن اراب امىرلىگىنىڭ استاناسى ءابۋ-دابيدە جاستار اراسىندا الەم چەمپيونى اتاندى.

ول 55 كەلى سالماق دارەجەسىندە وزبەكستاندىق دوستون رۋزيەۆتى، ارمەنيالىق ۆاگان حوۆسەپياندى، ازەربايجاندىق ناتيگ گۋربانليدى، جارتىلاي فينالدىق كەزدەسۋدە گرۋزيالىق يراكلي كۋپانادزەنى ۇتتى.

ال فينالدا وڭتۇستىك كورەيا ەلىنىڭ سپورتشىسى حا ريم ليمەن كەزدەسىپ، جەڭدى. ايتا كەتەيىك، ماعجان شامشادين دزيۋدو بويىنشا قازاقستاننان شىققان جاستار اراسىنداعى ەكىنشى الەم چەمپيونى.

م. شامشادين 1997-جىلى  قىزىلوردا قالاسىندا دۇنيەگە كەلگەن. ج. ءباھادۇر اتىنداعى وبلىستىق سپورتتا دارىندى بالالارعا ارنالعان مەكتەپ-ينتەرناتتى ءبىتىردى. قازىرگى تاڭدا م. مامەتوۆا اتىنداعى  قىزىلوردا گۋمانيتارلىق كوللەدجدە 2-كۋرستا وقيدى.

- مەملەكەت باسشىسىنىڭ قولداۋىنىڭ ارقاسىندا سپورت سالاسىنداعى جەتىستىكتەرىمىز ەسەلەنىپ وسۋدە. بۇل بايراقتى باسەكەدە ماعجان عانا جالعىز التىنعا قول جەتكىزدى. اتاق، مانساپقا بەرىلمە. ءالى الدا داڭعىل، جۇلدىزدى جول بار. بۇكىل سىر ەلى، قازاق ەلى ساعان تىلەكشى. ءبىز ساعان ءاردايىم قولداۋ كورسەتۋگە دايىنبىز، - دەدى وبلىس اكىمى ق. كوشەربايەۆ.