ورالدا اۋرۋحاناعا تۇسكەن بالالاردىڭ ءبارى دە - ينتەرناتتا تۇراتىندار
وسىعان وراي وتكىزىلگەن ءباپساسوز ءماسليحاتىندا وبلىستىق ءبىلىم باسقارماسى بالالار قۇقىعىن قورعاۋ ءبولىمىنىڭ باسشىسى حاجارءبيبى ەسكەندىروۆا اتالمىش مەكتەپتە 953 وقۋشى بولسا، سونىڭ 221 ى ينتەرناتتا تۇراتىنىن جەتكىزدى. بۇگىن تاڭعى ساعات 06.00 شاماسىندا بالالاردىڭ وزدەرىن جايسىز سەزىنۋىنە بايلانىستى جەدەل جاردەم شاقىرىلعان.
ب ق و تۇتىنۋشىلار قۇقىعىن قورعاۋ دەپارتامەنتى باسشىسىنىڭ ورىنباسارى سەرگەي شەربينانىڭ ايتۋىنشا، بالالاردىڭ ناۋقاستانۋى ىشەك جۇقپاسىنا بايلانىستى دەگەن بولجام جاسالۋدا، ءبىراق ناقتى دياگنوز ءالى قويىلعان جوق. ول زەرتحانا قورىتىندىلارى الىنعاننان كەيىن بەلگىلى بولادى. اۋرۋ بەلگىلەرى تەك ينتەرناتتا جاتاتىن بالالاردان بايقالىپ وتىر. ولار كەشە كەشكىسىن ەت قوسىلعان سورپا ىشكەن، سودان ۇشىنۋى ىقتيمال. ينتەرناتتاعى بارلىق 221 وقۋشىدان، تاماق پىسىرۋشىلەردەن جانە قارىم- قاتىناس جاساعان مۇعالىمدەردەن تالداۋ الىنعان.
وبلىستىق دەنساۋلىق ساقتاۋ باسقارماسى انا مەن بالا دەنساۋلىعىن قورعاۋ ءبولىمىنىڭ باسشىسى سارا ەسپانوۆانىڭ سوزىنە قاراعاندا، قازىرگى تاڭدا السىزدىكتەرى مەن قىزۋىنىڭ جوعارىلىعىنا بايلانىستى 50 بالا اۋرۋحانادا ەم الۋدا. ينتەرناتتا قالعان بالالار دا باقىلاۋدا.
اۆتور: ەلجان ەرالى
