قانات يسلام الداعى جەكپە- جەگىنە دايىندىعى جايلى ايتىپ بەردى
«اللا بۇيىرسا بارلىق دايىندىعىم جاقسى. جوعارى دەڭگەيدە ءوتىپ جاتىر. اياقتى اسپانعا كوتەرىپ جاتقان جوقپىن. قان دا، تەر دە اعىپ جاتىر. اللا قالاسا ءاربىر تامشى تەر مەن قان بەكەر اقپايدى دەپ ويلايمىن. (.. .) ايتەۋىر قازاقتىڭ كوك تۋى جەلبىرەسىن، قازاقتىڭ نامىسى جەردە قالماسىن دەپ كومەكتەسىپ جاتىر. سول ءۇشىن مەندەدە ايانىپ قالاتىن ەشتەڭە جوق. بارىمدى سالىپ دايىندىق جاساۋدامىن»، - دەپ كەلتىرەدى بوكسشىنىڭ ءسوزىن باسىلىم.
سونىمەن قاتار، قانات يسلام گولوۆكينمەن جۇدىرىقتاسۋعا قالاي قارايتىنىن ايتتى. ونىڭ پىكىرىنشە، قازىر گولوۆكيننىڭ ابدەن ءپىسىپ- جەتىلگەن كەزى. «قانشاما قيىندىق كورىپ، جەمىسىن ەندى كورىپ جاتىر. ول وسى جەڭىستى، جەمىستى كورۋگە ابدەن لايىق. ەڭ باستىسى، ءبىر اتان تۇيەگە جۇك بولاتىن، مەن، مەن دەگەن ەرجىگىتتەردىڭ جىلىگىن مايىستىراتىن قيىندىقتاردى كوتەرە ءبىلدى. گولوۆكين - ناعىز ازامات. ونىڭ جارىسىنا ەشقانداي كۇمان كەلتىرمەيمىن. قارىسلاسى ءالسىز بولسا دا، مىقتى بولسا دا بارىنە توتەپ بەرەدى. گەناعا تەك قانا ساتتىلىك تىلەيمىن. گەنا ءبىزدىڭ الدىمىزداعى تۋدى كوتەرۋشى بولسا، ءبىز سول تۋدى جىقپايمىز دەپ ويلايمىن. اللا قالاسا سول ىزبەن كەلە جاتىرمىز»، - دەدى ول.
بوكسشىنىڭ ايتۋىنشا، كاسىپقوي بوكستا بەيبىت شۇمەنوۆتىڭ دە ەڭبەگىن باعالاعانىمىز ءجون. «ول - امەريكادا اتى تانىمال بوكسشىلاردىڭ ءبىرى. ءوز جالعىز كەلىپ، قانشاما ادامعا الدانىپ، وسىنداي دارەجەگە جەتۋ وڭاي ەمەس. بەيبىت - ناعىز مىقتى، قايسار، باتىر جىگىت. قازاقتىڭ تۋىن كوتەرىپ وسى كۇنگە دەيىن ءجۇر. جاقىن دوسىم، ۇنەمى اقىل كورسەتىپ وتىرادى. ونىڭ كىشپەيىلدىلىگى، باتىرلىعى ايتۋعا تۇرارلىق. ودان كوپ نارسە ۇيرەنەمىن»، - دەپ پىكىرىن ايتتى قانات يسلام.
ەسكە سالايىق، وسىعان دەيىن قانات يسلامنىڭ كەلەسى جەكپە- جەگى قاشان وتەتىنى بەلگىلى بولعان ەدى. ول جەكپە- جەگىن 7 - قاراشا كۇنى مايامي قالاسىندا مەكسيكالىق الەكسيس كاماچوعا قارسى وتكىزەدى. ايتا كەتەيىك، 31 جاستاعى قانات يسلام كاسىبي رينگتە 19 جەكپە- جەك وتكىزىپ، بارلىعىندا جەڭىسكە جەتكەن. ول ءبىرىنشى ورتا سالماقتا WBA Fedelatin تيتۋلىنا يەلىك ەتەدى. سوڭعى كەزدەسۋىندە ول كولۋمبيالىق ورلاندو دە حەسۋس ەسترادانى نوكاۋتپەن جەڭدى.
