سولتۇستىك كورەيا ەكونوميكاسىندا تۇبەگەيلى وزگەرىستەر بايقالادى
دەگەنمەن وسى مەملەكەتتى زەرتتەۋشى ساراپشىلاردىڭ مالىمدەۋىنشە، سولتۇستىك كورەيا ەكونوميكاسىندا تۇبەگەيلى وزگەرىستەر بايقالادى. كوممۋنيستىك قاعيدالاردى ۇستاناتىن ەلدە بىرتىندەپ نارىقتىق قاتىناستار قالىپتاسا باستاعان. قارا نارىق سولتۇستىك كورەيادا 90-جىلدارى پايدا بولدى. سول كەزدە ۇزاققا سوزىلعان قۋاڭشىلىقتان ەل اشارشىلىققا دۋشار بولدى.
باسقا امالى قالماعان تۇرعىندار وزدەرىن اسىراۋدىڭ جاڭا جولدارىن ىزدەۋگە كىرىستى. اۋىلدى ەلدى مەكەندەردە بازارلار اشىلىپ، شارۋالار ءوز جەر تەلىمدەرىنە وسىرگەن كوكونىستى وزگە ونىمدەرگە ايىرباستايتىن بولدى. پحەنيان بيلىگى قانشالىقتى قاتال بولعانىمەن، وسىعان كونۋىنە تۋرا كەلىپ، بۇل بازارلار ءالى كۇنگە دەيىن ىستەپ ءجۇر. وسىنىڭ ارقاسىندا سانى كوپ بولماسا دا، قالتالى الەۋمەتتىك توپ پايدا بولدى. سالدارىنان بۇرىن بۇل ەلگە ءتان ەمەس تاۋارلارعا سۇرانىس تا ارتتى. قىتايمەن شەكارالىق ايماقتاعى اۋىلدا وسكەن كيم دانبي 13 جاسىنان باستاپ كونتراباندامەن اينالىسقان. قازىرگى كەزدە ول وڭتۇستىك كورەيادا تۇرادى. بۇگىندە ەل دۇكەندەرى تەليەۆيزورلاردان باستاپ شەتەلدىك شاراپتارعا دەيىن تاۋارعا تولى. كەزىندە بوس بولعان پحەنيان كوشەلەرىندە اۆتوكولىك كەپتەلىسىن ءجيى كورۋگە بولادى. قالادا ءوزارا باسەكەلەسكەن 4 تاكسي قىزمەتى بار. سولتۇستىك كورەيانىڭ قازىرگى باسشىسى كيم چەن ىننىڭ كورشى قىتايدىڭ تاجىريبەسىنە سۇيەنىپ، ەلىن جاڭا باعىتقا سالۋعا نيەتى بار ءتارىزدى.
اندرەي لانكوۆ، كورەيانى زەرتتەۋشى مامان:
- اكەسى جەكە مەنشىك كاسىپكەرلىككە ءتوزۋ نەمەسە ونى ءتۇپ- تامىرىمەن جويۋ جونىندە كوپ ويلانىپ، باسى قاتقان. كيم چەن ىن بولسا مۇلدە وزگەشە ساياسات جۇرگىزىپ كەلەدى، ۇندەمەي، جەكە مەنشىك ەكونوميكالىق بەلسەندىلىكتى قوستاپ، ىنتالاندىرادى.
سولتۇستىك كورەياعا قارسى قاتال سانكسيالار قابىلدانعان جاعدايدا، كيم چەن ىن بەتىن حالىققا قاراتۋعا ۋادە بەرگەن. ساراپشىلار پحەنيان اقىرى قىتاي ۇلگىسىندەگى دامۋ باعىتىنا تۇراتىنىنا سەنىمدى. ءبىراق بيلىگىنىڭ السىرەۋىنەن قاۋىپتەنگەن ءبىرقاتار جوعارى لاۋازىمدى تۇلعالار بۇعان دا قارسىلىق تانىتاتىن ءتۇرى بار.
www.24.kz
