تاعى ءبىر قازاقستاندىق كاسىپقوي بوكسشى كەزەكتى جەكپە-جەگىن نوكاۋتپەن جەڭدى
وتانداسىمىز نيۋ-يوركتە (ا ق ش) جەرگىلىكتى بوكسشى انتونيو چاۆەس فەرناندەستى ۇتتى.
باحتيار ەيۋبوۆ قارسىلاسىن ءبىرىنشى راۋندتىڭ ەكىنشى مينۋتىندا-اق جەڭدى.
شارشى الاڭ يەسى قازاقستاندىق بوكسشى ايتارلىقتاي قارسىلىق تانىتا العان جوق. 36 جاستاعى امەريكالىق تاجىربيەلى بوكسشى دا - گونك داۋىسى ەستىلىسىمەن شاپشاڭ قيمىلداپ، بىردەن سوققىنىڭ استىنا الاتىن قازاقستاندىق بوكسشىنىڭ جويقىن سوققىلارىنا تويتارىس بەرە المادى.
باحتيار ەيۋبوۆتىڭ جۇدىرىقتاسۋ مانەرى وزگەشە. ول قارسىلاسىن ءبىرىنشى راۋندتا-اق ۇرىپ قۇلاتۋدىڭ جولىن ىزدەيدى. وسىعان دەيىن وتانداسىمىز سپورتتىق مانسابىندا ءبىر قارسىلاسىن (جوزە بريۋيەر، 2012-جىل) 9 سەكۋندتا جەڭگەن. ونىڭ جۇدىرىقتاسۋ مانەرىن 1990-جىلدارى كاسىپقوي بوكس شارشى الاڭىندا جاسىنداي جارقىلداعان امەريكالىق بوكسشى دجەرالد ماككلەللانعا دا ۇقساتۋعا بولادى. ول دا قارسىلاسىن ءبىرىنشى راۋندتا-اق جەڭىپ شىعۋدى باستى ماقسات تۇتاتىن بوكسشىلاردىڭ ءبىرى بولاتىن.
ايتا كەتەيىك، باحتيار ەيۋبوۆتىڭ ەسىمى قازاقستاندىق كوپ جانكۇيەرلەر ءۇشىن اسا تانىس ەمەس. اقتوبە قالاسىندا دۇنيەگە كەلگەن بوكسشى وسىعان دەيىن ءازىربايجان ەلىنىڭ اتىنان الەمدىك ارەنادا باق سىنايدى دەگەن دە اقپاراتتار تاراعان ەدى.
كەيىننەن قوس تاراپ ءوزارا كەلىسىم-شارت ىمىراسىنا كەلە الماعان. بۇگىندە باحتيار كاسىپقوي بوكستا قازاقستاننىڭ تۋىنىڭ استىندا ونەر كورسەتىپ كەلەدى. بيىل امەريكالىق «Salita promoution» پروموۋتەرلىك كلۋبى قازاقستاندىق بوكسشىمەن كەلىسىم-شارتقا قول قويدى. ناتيجەسىندە بوكسشى الداعى ۋاقىتتا ءىرى جەتىستىكتەردى باعىندىرۋدى جوسپارلاپ وتىر.
