تاتار تاريحىنىڭ سوڭعى تومدارى شىقتى
تاتارستان استاناسى قازانداعى تاريح ينستيتۋتىندا «تاتار تاريحى» كوپ تومدىعىنىڭ سوڭعى - ءتورتىنشى جانە بەسىنشى تومدارى جۇرتشىلىققا تانىستىرىلدى.
تاريح ينستيتۋتىنىڭ ديرەكتورى رافايل حاكيموۆ «تاتار تاريحىن» جازۋدا XV-XVIІ عاسىرلارداعى تاتار مەملەكەتى مەن رەسەي قۇرامىنداعى تاتار حالقى جايلى ماعلۇماتتاردى جيناۋدىڭ قيىن بولعاندىعىن ايتادى.
- بۇل كەزەڭدى رەسەي تاريحشىلارى دا ناقتىلاپ جازباعان. تاتارلاردىڭ كازاكتارمەن سوعىسى تۋرالى دەرەكتەردى انىقتاۋ قيىنعا سوقتى. بيىل اۆتورلارىن تاۋىپ، بۇل تومدى جازىپ بىتىردىك، - دەيدى رافايل حاكيموۆ.
ول كىتاپتى جازۋ بارىسىندا ماسكەۋ تاراپىنان قارسىلىق بولماعانىن ايتادى.
- عالىمدار وبەكتيۆتى جازىپ، ورتاق ءتىل تابىسا ءبىلدى. ەڭبەك ءتۇرلى پىكىرلەر تۋدىرىپ جاتىر. كەيبىر عالىمدار قارسى بولدى، جيرينوۆسكي ءتارىزدى اڭداماي ايتقان ساياساتكەرلەر بولدى، - دەيدى قازانداعى تاريح ينستيتۋتىنىڭ ديرەكتورى.
رافايل حاكيموۆتىڭ ايتۋىنشا، «تاتار تاريحىن» جازۋعا رەسەي، ۆەنگريا، بولگاريا، گەرمانيا، پولشا، ا ق ش، قازاقستان، تايۆان، تۇركيا ۋنيۆەرسيتەتتەرىنەن 300 شاقتى عالىمدار مەن اۆتورلار قاتىسقان.
تاريح ينستيتۋتى ديرەكتورىنىڭ سوزىنشە، تاتار تاريحىن باياندايتىن بۇل تومداردىڭ كەيبىرى 2 مىڭ دانا تيراجبەن باسىلعان، كەيبىرى ودان كوبىرەك بولعان. ءبىر تومدى باسىپ شىعارۋ ءۇشىن 3 ميلليونداي رۋبل جۇمسالعان.
عالىمنىڭ سوزىنشە، «تاتار تاريحى» كوپتومدىعىنىڭ ەلەكتروندى ۆەرسياسى دا شىعادى. «ونى ينتەرنەتتەن دە تابۋعا بولادى. PDF نۇسقاسى دا دايىن، سمارتفونعا ارنالعان نۇسقاسىن تەزىرەك دايىنداپ بىتىرمەكپىز» دەدى رافايل حاكيموۆ.
ماقالانى تاتار تىلىنەن اۋدارعان - ءسانيا تويكەن.
«ازاتتىق»
