پاۆلودار وبلىسىندا سەگىز وقۋشى ءتورت ءتىلدى ەركىن مەڭگەرگەن
بۇل تۋرالى اگەنتتىككە وبلىستىق ءبىلىم بەرۋ باسقارماسى مەكتەپكە دەيىنگى جانە جالپى ورتا ءبىلىم بەرۋ ءبولىمىنىڭ باسشىسى ءلايلا ءجۇسىپوۆا ءمالىم ەتتى.
- بىرنەشە تىلدە ءوز ويىن ەركىن جەتكىزە الاتىن جوعارىدا اتالعان وقۋشىلاردىڭ بارلىعى دارىندى بالالارعا ارنالعان مەكتەپتەردە ءبىلىم الۋدا. ولار - №3 گيمنازيانىڭ 10-11 - سىنىپ وقۋشىلارى تەمىرلان پازىلوۆ جانە اناستاسيا گونچارەنكو، «جاس دارىن» مەكتەبىنىڭ 9-10 - سىنىپ وقۋشىلارى جىبەك بايعۇلوۆا مەن نۇرگۇل ومار ، اقسۋ قالاسى گيمنازياسىنىڭ 11- سىنىپ وقۋشىسى ءمادينا ىسقاقوۆا، قازاق- تۇرىك ليتسەيىنىڭ 8, 11- سىنىپ وقۋشىلارى مارينا فالەيەۆا، راحات جۇمەكين، ساعىندىقوۆ عابيت، - دەيدى ءلايلا ءجۇسىپوۆا.
ءبولىم باسشىسىنىڭ ايتۋىنشا، قازىرگى ۋاقىتتا كوپءتىلدى ءبىلىم بەرۋ باعدارلاماسى بويىنشا وبلىستا 48 مەكتەپ جۇمىس ىستەيدى. ونىڭ ىشىندە بيىلعى وقۋ جىلىندا اتالعان جوباعا 29 مەكتەپ ەنگىزىلگەن. دارىندى بالالارعا ارنالعان ءبىلىم وردالارى مەن پاۆلودار قالاسى № 42 مەكتەبىنىڭ ۇستازدارى ايماق مەكتەپتەرىنە فيزيكا، بيولوگيا، ماتەماتيكا، ينفورماتيكا پاندەرىن اعىلشىن تىلىندە وقىتۋ بويىنشا ادىستەمەلىك كومەك كورسەتۋدە.
- «كوپتىلدىلىك» باعدارلاماسىن جۇزەگە اسىرۋعا مۇمكىندىگى بار، بىرنەشە ءتىلدى مەڭگەرگە پەداگوگ ماماندار جەتكىلىكتى. سوندىقتان دا بۇل ماقساتتا شەتەل ماماندارى تارتىلمايدى. وبلىستىق مامانداندىرىلعان مەكتەپتەردە مەملەكەتتىك، ورىس، اعىلشىن تىلدەرىنەن بولەك، باسقا تىلدەردى دە مەڭگەرۋگە زور كوڭىل بولىنۋدە. ماسەلەن، قازاق- تۇرىك ليتسەيلەرىندە - تۇرىك، اقسۋ قالاسىنىڭ گيمنازياسىندا - قىتاي، №3 گيمنازيادا - فرانسۋز جانە نەمىس، «جاس دارىن» مەكتەبىندە - فرانسۋز، قىتاي تىلدەرى وقىتىلادى، - دەيدى ل. ءجۇسىپوۆا.
ايتا كەتەرلىگى، ءۇش تىلدە وقىتۋ باعدارلاماسىن ەنگىزۋ پاۆلودار قالاسىنىڭ № 42 مەكتەبى مەن اقسۋ قالاسىنىڭ گيمنازياسىندا باستالعان.
