10:38, 30 - قازان 2015 | GMT +5
جاپونيادا تۇماۋدى ءبىر كۇندە ەمدەي الاتىن ءدارى شىعارىلادى
استانا. قازاقپارات - جاپونيانىڭ فارماكولوگيالىق كومپانياسى 2018-جىلى ادامدى تۇماۋدان ءبىر كۇندە ەمدەي الاتىن ءدارى شىعارۋدى كوزدەپ وتىر، دەپ حابارلادى ر ي ا نوۆوستي.
جاڭا ءدارى ۆيرۋستىڭ تاراۋىنا جول بەرمەي، ونى جويادى. پرەپارات ۆيرۋستىڭ كوبەيۋىنە اسەر ەتەتىن فەرمەنتتەردىڭ پايدا بولۋىنا كەدەرگى كەلتىرەدى. وسىنىڭ ارقاسىندا اتالعان ءدارىنى پايدالانىپ، ءبىر كۇندە ەمدەلۋگە بولادى.
ءدارى جاپونيادا العاشقى كلينيكالىق سىناقتان ءوتىپ، ءوزىنىڭ تيىمدىلىگىن كورسەتتى، دەپ جازدى «نيككەي» گازەتى. ەكىنشى كەزەڭ تۇماۋعا شالدىعۋ دەڭگەيى ۇلعاياتىن قاراشا ايىندا باستالادى. پرەپارات جۇزدەگەن ناۋقاسقا بەرىلەدى.
جاپونيانىڭ دەنساۋلىق ساقتاۋ مينيسترلىگى ءدارىنىڭ تيىمدىلىگى مەن قاۋىپسىزدىگى دالەلدەنگەن سوڭ جانە ليتسەنزيا الۋ ۇدەرىسىنەن كەيىن ونىڭ 2018-جىلى ساتىلىمعا شىعۋ مۇمكىندىگىن ايتتى.
