بولاشاقتا سۋتەگىمەن جۇرەتىن كولىكتەر حالىققا قولجەتىمدى بولماق
ايگىلى كورمەدە دۇنيە ءجۇزىنىڭ ۇزدىك تەمىر تۇلپارلارى جۇرت نازارىنا ۇسىنىلادى. ولاردىڭ اراسىندا وزدىگىنەن باسقارىلاتىن كولىكتەر، سۋتەگىمەن جۇرەتىن اۆتوبۋستار جانە ۇزدىك سۋپەركارلار بار.
بولاشاقتا اۆتوونەركاسىپتى ءبىرشاما وزگەرىس كۇتىپ تۇر. وزدىگىنەن شەشىم قابىلدايتىن جۇرگىزۋشىسىز ماشينا ەندى تەك قيال عانا ەمەس. جاياۋ جۇرگىنشىلەردىڭ قاۋىپسىزدىگى ءۇشىن ينجەنەرلەر ءتىپتى كولىكتەردىڭ سىرتىن جۇمساق قىلىپ، ال جانارمايدىڭ ورنىنا سۋتەگىن پايدالانباق. شامامەن 10-15 جىلدان كەيىن ءدال وسىنداي تەمىر تۇلپارلاردى تىزگىندەيتىن بولامىز.
«بۇل مودەلدىڭ اۆتوكولىكتەن دە ارتىق پايداسى بار دەسەم بولادى. ءبىز ماشينا ءجۇرۋ ءۇشىن وعان ەنەرگيا كەرەك دەگەن قاعيدانى بۇزدىق. ماسەلەن، جاڭا ەلەكتروموبيل - ەنەرگيا كوزى. ماشينامەن جۇرگەن كەزدە جينالعان ەنەرگيانى تۇرمىستا پايدالانۋعا مۇمكىندىك بار. ءبىر سوزبەن ايتقاندا، گەنەراتور كولىك»، - دەيدى جوبا مەنەدجەرى تاكەو مورياي.
جاپونيالىق اۆتوءوندىرىس كورمەدە ءوزىنىڭ جاڭا ۇلگىدەگى بىرنەشە كولىگىن ۇسىندى. ولاردىڭ اراسىندا گيبريدتىق كروسسوۆەردى ەرەكشە اتاۋعا بولادى. تەحنيكانىڭ سوڭعى ۇلگىسىمەن جابدىقتالعان زاماناۋي ماشينا ءبىر جىلدان كەيىن جۇرگىزۋشىلەرگە جول تارتپاق.
«قازىر جانارمايدى 20 پايىزعا دەيىن ۇنەمدەۋگە مۇمكىندىك بار. ازىرگە كولىك تەك جاپونيا مەن امەريكا نارىعىنا شىعادى. الداعى جىلدىڭ جەلتوقسانىندا ورتالىق ازيا ەلدەرىنە دە جەتەدى دەپ جوسپارلاپ وتىرمىز»، - كومپانيانىڭ باس ينجەنەرى: كوۋدجي تويوشيما.
ەۋروپالىق اۆتوكولىكتەر دە باستى نازاردا. Mercedes-Benz ۇسىنعان وزدىگىنەن باسقارىلاتىن مينيۆەنگە قىزىعۋشىلىق كوپ. Volkswagen كونسەرنى دە وزگەلەردەن قالىس قالار ەمەس. كورمەگە قاتىسۋعا كەلگەن 160 كومپانيا ۇزدىك دەگەن ۇلگىلەرىن كوپشىلىككە پاش ەتۋدە. سونداي- اق جاڭا 76 كولىكتىڭ تۇساۋى كەسىلدى.
