الەمدىك سپورتتاعى بىتىسپەس قارسىلاستار كىمدەر؟

استانا. قازاقپارات - سپورتشىعا الەمنىڭ ۇزدىگى اتانۋ ءۇشىن كوپتەگەن كەدەرگىلەردەن وتۋگە تۋرا كەلەدى. ال سپورتتىڭ ەڭ باستى قاسيەتى - قارسىلاستىق ەكەنى دە راس.

وسى ورايدا، الەمدىك سپورتتاعى بىتىسپەس قارسىلاستار تۋرالى ماتەريالدى sports.ru عا سىلتەمە جاساپ نازارلارىڭىزعا ۇسىنامىز.

كريشتيانۋ رونالدۋ مەن ليونەل مەسسي

قازىرگى فۋتبولدى پورتۋگالدىق پەن ارگەنتينالىقتىڭ تەكە- تىرەسىنسىز ەلەستەتۋ مۇمكىن ەمەس. ولار الەمنىڭ ەڭ ۇزدىك ويىنشالارى ءارى ءبىر- بىرىنە بىتىسپەس قارسىلاس سانالاتىن -  «رەال» مەن «بارسەلونادا» وينايدى. ال بۇل كوماندالار اراسىنداعى باقتالاستىقتىڭ شەكتەن شىققانى سونشا، جانكۇيەرلەرىنە دەيىن ءبىر-ءبىرىن جەك كورەدى. سوڭعى التى جىلدا الەمنىڭ ۇزدىك ويىنشىسىنا بەرىلەتىن «التىن دوپتى» وسى ەكى فۋتبولشى ءوزارا ءبولىسىپ كەلەدى. ازىرگە 4:3 ەسەبىمەن مەسسي الدا.

كلۋبتىق دەڭگەيدە رونالدۋ مەن مەسسي مۇمكىن بولعان جۇلدەلەردىڭ ءبارىن جەڭىپ الدى. ال ۇلتتىق قۇراما ساپىندا الەم چەمپيونى اتانۋ باقىتى ەكەۋىنە دە ءالى بۇيىرعان جوق.

مەسسي قاراپايىم جانە جاقسى رولدەگى كەيىپكەرگە قاتتى كەلەدى. ال رونالدۋ ۇنەمى ەلدىڭ نازارىندا بولۋدى قالايتىنىمەن دە ەرەكشەلەنىپ ءجۇر.

سيدني كروسبي مەن الەكساندر وۆەچكين

بۇل حوككەيشىلەردىڭ اراسىنداعى تارتىس وسىدان ون جىل بۇرىن باستالعان. سپورتتىق مانسابىن ەكەۋىنىڭ ءبىرى اياقتاعان كەزدە عانا ولاردىڭ تەكە- تىرەسىنە نۇكتە قويىلماق. 2005 -جىلى كانادا جاستار قۇراماسى فينالدا رەسەيدى 6:1 ەسەبىمەن جەڭگەن كەزدە كروسبي العا شىققان. سول كەزدەن باستاپ سيدني تىزگىندى بەرەر ەمەس. ەكەۋى دە 2005-2006 -جىلعى ماۋسىمدا ۇلتتىق حوككەي ليگاسىندا ونەر كورسەتۋدى باستاعان. سول جىلى رەسەيلىكتىڭ ايقىن باسىمدىقپەن جەڭگەنى راس. ۇ ح ل- دا وۆەچكين وينايتىن «ۆاشينگتون» مەن كروسبي نامىسىن قورعايتىن «پيتسبۋرگ» كەزدەسكەندە جانكۇيەر نازارىنىڭ تاپ وسى ەكى ويىنشىدا بولاتىنىن بولجاۋ قيىن ەمەس.

«كىم مىقتى؟» دەگەن سۇراققا جاۋاپ ىزدەگەندە كروسبيدىڭ مىقتىلىعىن مويىنداۋعا تۋرا كەلەدى. ول وليمپيادا ويىندارىنىڭ ەكى دۇركىن چەمپيونى. 2010 -جىلى ءوز وتانىندا وتكەن قىسقى ويىنداردا توپ جارعان كروسبي 2014 -جىلى باستى قارسىلاسىنىڭ وتانىنا كەلىپ تە التىندى الىپ كەتكەن بولاتىن.

مۇحاممەد ءالي مەن دجو فرەيزەر

الەمدەگى بوكسسۇيەر قاۋىمنىڭ مۇحاممەد ءاليدى بارلىق ۋاقىتتىڭ ۇزدىك بوكسشىسى دەپ اتايتىنى راس. ءبىراق اليگە دجو فرەيزەردىڭ ەڭ مىقتى قارسىلاس اتانعانىن دا ۇمىتۋعا بولمايدى. ولار ءبىر-بىرىمەن وتە قيىن ءارى تارتىستى ءۇش جەكپە-جەك وتكىزدى. بۇل ءۇش كەزدەسۋ الەم بوكسىنىڭ تاريحىندا التىن ارىپپەن جازۋلى تۇر.

1970 -جىلى ءالي مەن فرەيزەر العاش رەت كەزدەسىپ، فرەيزەر ءاليدى جەڭگەن تۇڭعىش بوكسشى اتاندى. 1974 -جىلى ۇپاي سانى بويىنشا ءالي جەڭىسكە جەتتى. ال ەكى سپورتشىنىڭ تەكە- تىرەسىنە نۇكتە قويعان كەزدەسۋ 1975 -جىلى فيليپپيندە ءوتىپ، «مانيلاداعى تريللەر» دەگەن اتاۋ الدى. ولار 14 راۋند بويى جۇدىرىقتاسقان. ماتچ سوڭىنا قاراي دجو فرەيزەردىڭ ەكى كوزى مۇلدە اشىلماي قالدى. 15- راۋندقا دجو شىققان جوق. سەبەبى، ول دا ءالي سياقتى بار مۇمكىندىگىن سالعان بولاتىن...

الەكسەي ياگۋدين مەن ەۆگەنيي پليۋشەنكو

رەسەيلىك سپورتشىلار ياگۋدين مەن پليۋشەنكو اراسىنداعى دۋەل عاسىر باسىنداعى ەڭ مىقتى تەكە- تىرەستىڭ ءبىرى بولدى. ولاردىڭ شەشۋشى «شايقاسى» 2002 -جىلعى سولت- لەيك- سيتي وليمپياداسىندا ورىن العان ەدى. قىسقا باعدارلامادا قۇلاپ قالعان پليۋشەنكو التىننان ءبىرجولا ءۇمىتىن ءۇزدى. ال كۇنى بۇگىنگە دەيىن كەرەمەت قويىلعان باعدارلاما سانالاتىن «قىس» جانە «تەمىر ماسكالى ادامدى» كەرەمەت ورىنداعان الەكسەي ياگۋدين چەمپيون اتاندى. 2003 -جىلى ياگۋدين جاراقاتىنا بايلانىستى سپورتتان كەتتى. ال پليۋشەنكو 2006 -جىلى تۋرين وليمپياداسىندا جەڭىسكە جەتىپ، 2014 -جىلى كوماندالىق سىندا سوچي وليمپياداسىنىڭ التىنىن الدى. سپورتشىلار مۇز ايدىنىنىڭ سىرتىندا دا ءبىر- بىرىمەن جاقسى قارىم- قاتىناستا ەمەس.

رودجەر فەدەرەر مەن رافاەل نادال

نادال مەن فەدەرەر ەڭ العاش رەت 2004 -جىلدىڭ ناۋرىزىندا كەزدەستى. ول كەزدە فەدەرەر الەمنىڭ ەكىنشى راكەتكاسى ەدى، ال نادال كوپ ەشكىم تاني بەرمەيتىن 17 جاستاعى يسپاندىق قانا بولاتىن. سول ماتچتا رافا ايگىلى قارسىلاسىن كۇتپەگەن جەردەن جەڭىپ كەتىپ، ەكەۋىنىڭ اراسىنداعى تەكە- تىرەستى باستادى.

ارينە، بۇل ەكى تەننيسشىنىڭ اراسىندا كەرەمەت كەزدەسۋلەر ءوتتى. الايدا، 4 ساعات، 48 مينۋتقا سوزىلىپ، قاس قارايعانشا وتكەن 2008 -جىلعى ۋيمبلدوننىڭ فينالىن ەشكىم ۇمىتا قويماسى انىق. 5 سەت قورىتىندىسى بويىنشا نادال جەڭىسكە جەتىپ، 5 جىل بويى ۋيمبولدوندا سالتانات قۇرعان فەدەرەردى تاعىنان ءتۇسىردى.

بۇگىندە شۆەيتساريالىق سپورتشى جاسىنىڭ ۇلعايعانىنا بايلانىستى كورنەكى ويىن كورسەتىپ جۇرگەن جوق دەيتىندەر تابىلادى. ايتسە دە، ەكى تەننيسشى ءالى تالاي ۇمىتىلماس كەزدەسۋلەر وتكىزەدى دەگەن ءۇمىت باسىم.

مايك تايسون مەن ەۆاندەر حوليفيلد

تايسون مەن حوليفيلد اراسىنداعى جەكپە- جەك ەڭ داۋلى كەزدەسۋلەر رەتىندە تاريحتا قالدى. وعان سەبەپ - تايسوننىڭ قارسىلاسىنىڭ قۇلاعىن تىستەپ الۋى.

قارسىلاسىنىڭ قۇلاعىن تىستەپ، تاريحتا قالعان تايسون اقىرى حوليفيلدتى جەڭە الماي، شارشى الاڭمەن قوشتاستى. 1996 -جىلى وتكەن العاشقى كەزدەسۋدىڭ 11- راۋندىندا تورەشى جەكپە- جەكتى توقتاتىپ، قاتتى سوققىنىڭ استىندا قالعان تايسوندى امان الىپ قالدى. جەڭىس تەحنيكالىق نوكاۋتپەن حوليفيلدكە بەرىلدى.

قارىمتا ماتچ 1997 -جىلدىڭ ماۋسىمىندا ءوتىپ، جەكپە-جەك كەزىندە تايسون حوليفيلدىڭ قۇلاعىن تىستەپ الدى. تورەشى سول بويدا جەكپە-جەكتى توقتاتپاعانى ءۇشىن ءالى دە ۇيالاتىن شىعار. تەك ءۇشىنشى راۋند اياقتالعان سوڭ عانا كەزدەسۋ توقتاتىلىپ، تايسون شارشى الاڭنان شەتتەتىلدى. ال حولفيلد باستى قارسىلاسىنان جەڭىلمەگەن بوكسشى بولىپ تاريحتا قالدى. 2009 -جىلى حوليفيلد تايسوندى كەشىرگەنىن ايتتى، بۇگىندە ولار جاقسى ارالاسىپ تۇراتىن دوستار.

ميحاەل شۋماحەر مەن ميكا حاككينەن

شۋماحەردىڭ «فورمۋلا -  1» باسەكەسىندەگى مانسابى ۇزاق ءارى تابىستى بولدى. ءتىپتى، ول جەڭبەگەن سپورتشىلار قالمادى دەسەك تە بولاتىن شىعار. الايدا، اتىشۋلى شۋماحەرمەن يىق تىرەستىرىپ، ءتىپتى، كەي كەزدەرى ودان وزىپ كەتكەن ءبىر سپورتشى بار. ول -

فينليانديالىق ميكا حاككينەن. شۋماحەرمەن جارىسۋعا قورىقپاعان ميككيدىڭ ەكى چەمپيوندىق اتاعى كوپ نارسەنى اڭعارسا كەرەك.

تاس جولدا قارسىلاس اتانعانىمەن، سپورتشىلار ومىردە جاقسى قارىم- قاتىناستا بولعان. شۋماحەر تاۋدان قۇلاپ، كومادا جاتقان كەزدە ونىڭ ايتقان سوزدەرى ونىڭ ازاماتتىعىن دا كورسەتسە كەرەك. «سەن ەكەۋمىزدىڭ تاس جولدا كۇرەسكەنىمىز سياقتى كۇرەسۋىڭ كەرەك!»، -  دەپ جازعان بولاتىن حاككينەن.

جوزە موۋرينيۋ مەن حوسەپ گۆارديولا

باسەكەلەستىك تەك سپورتشىلاردىڭ عانا ەمەس، باپكەرلەردىڭ اراسىندا دا بولادى. وعان باستى دالەل - قازىرگى فۋتبولداعى بىلىكتى مامان سانالاتىن موۋرينيۋ مەن گۆارديولانىڭ تەكە- تىرەسى. كەزىندە ولار ءبىر كوماندادا بولعان. پەپ «بارسەلونانى» ورگە سۇيرەگەن ويىنشىلاردىڭ ءبىرى، ال جوزە ايگىلى باپكەر بوببي روبسوننىڭ كومەكشىسى ەدى. كەيىن ولار قارسىلاسقا اينالىپ شىعا كەلدى.

2010 -جىلى جوزە جاتتىقتىراتىن «ينتەر» جەڭىلىس دەگەننىڭ نە ەكەنىن بىلمەيتىن «بارسەلونانى» ۇتىپ كەتتى. سودان سوڭ، موۋرينيۋ يتاليانى تاستاپ، يسپانياداعى ەڭ جۇلدىزدى كوماندالاردىڭ ءبىرى «رەالدى» جاتتىقتىرۋعا كەلدى. مىنە، وسىدان سوڭ ءبارى دە باستالدى: داۋلى باسپا ءسوز ءماسليحاتتارى، ءبىر- ءبىرىن سوزبەن تۇيرەپ ءوتۋ جانە سۋپەركوماندالاردىڭ كەرەمەت ويىندارى.

بۇگىندە ەكى مامان دا اتالعان كلۋبتاردا جۇمىس ىستەمەيدى. موۋرينيۋ لوندوننىڭ «چەلسي» كلۋبىن جاتتىقتىرسا، گۆارديولا «باۆاريا» كلۋبىنا باسشىلىق ەتەدى.

دەرەككوز: NUR. KZ