قازاقستان مەن موناكو كنيازدىگى اراسىندا ءوزارا قۇقىقتىق كومەك تۋرالى شارت قابىلداندى - سەنات
ەندى قۇجات مەملەكەت باسشىسىنىڭ قول قويۋىنا جولدانادى.
شارتقا سايكەس، تاراپتار قىلمىستىق ىستەر بويىنشا ءبىر-بىرىنە ءوزارا قۇقىقتىق كومەكتەر كورسەتەدى.
«موناكو كنيازدىگى شاعىن، قاۋىپسىز ءارى باي مەملەكەت. ونىڭ اۋماعى ەكى شارشى شاقىرىم عانا، ياعني ەكسپو-عا بولىنگەن جەرمەن شامالاس. حالقىنىڭ سانى 37 مىڭ ادامدى قۇرايدى، سوعان قاراماستان، وندا 50 گە جۋىق بانكتەر جۇمىس جاسايدى. ينۆەستيتسيالىق تارتىمدىلىعى جوعارى بولعاندىقتان، بۇل ەلگە قونىستانىپ تۇرامىن دەۋشىلەر از ەمەس. سول سەبەپتەن قىلمىستىق قورعاۋ سالاسىنداعى شارتتى موناكوعا ءبىز ۇسىندىق»، - دەيدى ق ر باس پروكۋرورىنىڭ ورىنباسارى جاقىپ اسانوۆ.
ونىڭ ايتۋىنا قاراعاندا، موناكودا جالعىز تۇرمە بار ەكەن. ول تەڭىز جاعالاۋىندا ورنالاسقان ءارى وندا بارلىق جاعدايلار جاسالعان.
«بۇگىنگى كۇنى بۇل جالعىز تۇرمەدە نەبارى توعىز ادام عانا جازاسىن وتەۋدە. ولاردىڭ اراسىندا قازاقستان ازاماتى جوق. ازاماتتارىمىز قاي جەردە بولماسىن، ولاردى قورعاۋ، ولاردى قامقورلىعىمىزعا الۋ ءبىزدىڭ كونستيتۋتسيامىزدىڭ تالابى»، - دەدى باس پروكۋروردىڭ ورىنباسارى.
ونىڭ سوزىنە قاراعاندا، اتالعان شارت ارقىلى قازاقستان كەيبىر تەرگەۋ امالدارىن موناكودا جۇرگىزۋ قۇقىقتارىن الادى. ماسەلەن، كۋادەن جاۋاپ الۋ، ءتىنتۋ جۇرگىزۋ، زاتتاي دالەلدەمەلەردى ىزدەۋ، اكتيۆتەردى ەلگە قايتارۋ، ەڭ اقىر اياعى قاراپايىم اقپارات سۇراتۋ دا قامتىلادى.
«تاراپتار بۇدان باسقا دا كومەكتەر كورسەتە الادى. ءبىر عانا شارت بار، بۇل ماسەلەلەر ەكى ەلدىڭ ۇلتتىق زاڭنامالارىنا قايشى كەلمەۋى كەرەك. بۇدان باسقا، ەكى مەملەكەت تە ونداي كومەكتەر كورسەتۋدەن باس تارتۋعا قۇقىلى. ونىڭ نەگىزدەرى شارتتا انىق ايقىندالعان»، - دەدى ج. اسانوۆ.
اۆتور: قانات مامەتقازى ۇلى
