ەلباسىنىڭ لوندونعا ساپارىندا ۇلى بريتانيامەن ءوزارا قۇقىقتىق كومەك تۋرالى كەلىسىمگە قول قويىلۋى كۇتىلەدى

استانا. قازاقپارات - ەلباسى ن. نازاربايەۆتىڭ كەلەسى اپتاداعى لوندونعا ساپارىندا قازاقستان مەن ۇلى بريتانيا اراسىنداعى ءوزارا قۇقىقتىق كومەك تۋرالى كەلىسىمگە قول قويىلاتىنى كۇتىلەدى.

بۇل تۋرالى بۇگىن پارلامەنت سەناتىندا ق ر باس پروكۋرورىنىڭ ورىنباسارى جاقىپ اسانوۆ ءمالىم ەتتى.

جالپى وتىرىستا پالاتا دەپۋتاتتارى «قازاقستان رەسپۋبليكاسى مەن موناكو كنيازدىگى اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭ جوباسى تالقىلانعان بولاتىن. باس پروكۋرور ورىنباسارىنىڭ ايتۋىنشا، بۇگىنگى كۇنى قازاقستان ەۋروپا كەڭەسىنىڭ وڭتۇستىك-شىعىس ەلدەرىنىڭ قۇجاتتارىنا قوسىلۋعا قاتىستى جۇمىستار اتقارىلىپ جاتىر. بۇل ءۇشىن وسى ۇيىمعا مۇشە ءاربىر ەلدىڭ جەكە-جەكە كەلىسىمى قاجەت، ونداي جۇمىستار جالعاسۋدا.

«دەگەنمەن، ۋاقىتتى جوعالتپاي، ماڭىزدى دەگەن ەلدەرمەن، اسىرەسە، ەۋروپالىقتارمەن ەكىجاقتى شارتتار جاساسۋدامىز. العاشقى كەزدە ولار قازاقستانعا ۇلكەن ىنتا بىلدىرگەن جوق. تەك 2012-جىلى ق ر پرەزيدەنتى تىكەلەي ءوزى ارالاسىپ، يسپانيامەن ءۇش شارتقا قول قويعان بولاتىن. وسىلايشا، ەۋروپاعا «تەرەزەمىز» اشىلدى. سودان بەرى نەبارى ءۇش جىلدا يتاليا، بولگاريا، چەحيا سەكىلدى ەلدەرمەن بارلىعى ون ەكى شارتقا قول جەتكىزىلدى. كەلەسى اپتاعا ەلباسى ن. نازاربايەۆتىڭ لوندونعا جوسپارلانعان ساپارى بارىسىندا قازاقستاننىڭ  ۇلى بريتانيامەن ءوزارا قۇقىقتىق كومەك تۋرالى كەلىسىمگە قول قويىلماق»، - دەدى ج. اسانوۆ.

ونىڭ سوزىنە قاراعاندا، الداعى ۋاقىتتا گەرمانيا، سلوۆاكيا، سەربيا سەكىلدى ون ەلمەن شارتتار جاساسۋ كوزدەلۋدە.

اۆتور: قانات مامەتقازى ۇلى