مەملەكەتتىك «اق جاۋىن» كامەرالىق وركەسترى باتىس قازاقستاندا ونەر كورسەتتى - فوتو

ورال. قازاقپارات - قازاق حاندىعىنىڭ 550 جىلدىعى اياسىندا «اق جاۋىن» مەملەكەتتىك كامەرالىق وركەسترى باتىس قازاقستان وبلىسىنا شىعارماشىلىق ساپارمەن كەلىپ، ءوز ونەرىن كورسەتتى.

وبلىستىق قازاق دراما تەاترىندا قويىلعان كونسەرت شىمىلدىعى جانتورەنىڭ «شالقىما» كۇيىمەن اشىلدى.

وركەستردىڭ كوركەمدىك جەتەكشىسى، بەلگىلى كۇيشى-كومپوزيتور، قازاقستان رەسپۋبليكاسىنىڭ ەڭبەك سىڭىرگەن ءارتىسى سەكەن تۇرىسبەك ءوزىنىڭ «اق جاۋىن» كۇيىنە قوسا باسقا دا تۋىندىلارىن ورىندادى. سونىڭ ىشىندە قازاق حاندىعىنىڭ 550 جىلدىعىنا ارنالعان «ماڭگىلىك ەل»، سونداي-اق «ارۋانا»، «ۇلى دالا»، «كوڭىل تولقىنى»، «قوڭىر قاز»، «دارابوز» سىندى تۋىندىلارى كورەرمەندەرگە ەرەكشە اسەر ەتتى.

شىعارمالارىنىڭ شىعۋ تاريحىن دا جۇرتشىلىققا ادەمى جەتكىزگەن سەكەن تۇرىسبەكتىڭ ايتۋىنشا، 1994 -جىلى ەلباسىنىڭ قولداۋىمەن الماتىدا قۇرىلعان وركەستر كەيىن استانادا قونىس تەپتى. اتى ايتىپ تۇرعانىنداي، اق جاۋىن - قازاق حالقى ءۇشىن جاقسى ىرىم. ءاردايىم ەلدى جاقسىلىقتارعا ۇندەپ، قازاقتىڭ ماڭگىلىك ونەرى - كۇيمەن سۋسىنداتۋدىڭ ءوزى ءبىر باقىت. بۇعان دەيىن قازاقستاننىڭ بارلىق دەرلىك وڭىرىندە بولعان وركەستر اق جايىققا العاش رەت كەلدى.

«اق جاۋىن» مەملەكەتتىك كامەرالىق وركەسترىنىڭ ءارتىسى، باتىس قازاقستان وبلىسىنان تۇلەپ ۇشقان ميرا تاستەنوۆا سەيدوللا بايتەرەكوۆتىڭ سازسىرنايعا جازىلعان «كىشكەنتاي» كۇيىن وركەستردىڭ سۇيەمەلدەۋىندە ورىنداپ، حالىقتى ءبىر سەرپىلتسە، ونەر ۇجىمى ءمالعاجدار اۋباكىروۆتىڭ «تالاسىن»، دينانىڭ «اسەم قوڭىرىن»، تولەگەن مومبەكوۆتىڭ «سالتانات» سەكىلدى شىعارمالارىن ورىندادى.

وركەستردىڭ ءانشىسى التىناي مامىروۆا سەكەن تۇرىسبەكتىڭ «اققۋ سازى» ءانىن، ال قازاقستاننىڭ ەڭبەك سىڭىرگەن قايراتكەرى، حالىقارالىق، رەسپۋبليكالىق كونكۋرستاردىڭ لاۋرەاتى ەرلان رىسقالي كومپوزيتوردىڭ جاڭا تۋىندىسى - اقىن نەسىپبەك ايت ۇلى ءسوزىن جازعان «قايران، ءومىر» انىمەن بىرگە جەكە دومبىرادا كوپشىلىكتىڭ سۇراۋىمەن مولدابايدىڭ ءانى «مولدابايدى»، مۇحيتتىڭ «پاڭكويلەگىن» اۋەلەتە شىرقادى.

ەلباسىنىڭ «نۇرلى جول - بولاشاققا بارار جول» اتتى جولداۋىندا، باسقا دا ستراتەگيالىق قۇجاتتاردا ايتىلعان باستى باعىتتاردى بۇقارا حالىققا جەتكىزۋ، ۇلتتىق جانە الەمدىك ونەر تۋىندىلارىن كەڭىنەن ناسيحاتتاۋ ماقساتىندا ەلگە شىققان وركەستر سونداي-اق اقساي قالاسىندا، وبلىس اۋداندارىندا كونسەرت قويىپ، كورەرمەندەردىڭ ريزاشىلىعىنا بولەندى.

 

اۆتور: ەلجان ەرالى