پەتروپاۆلدا ماعجان جۇمابايەۆ تۇرعان ءۇي ۇلكەن داۋعا قالدى
قازىر ونىڭ سىرتقى كەلبەتى وزگەرتىلگەلى جاتىر. «تاريحي ساۋلەت ەسكەرتكىشى» دەپ تانىلعان عيماراتتىڭ يەسى ۇيگە جاپسارلاستىرىپ جاڭا قۇرىلىس باستاماقشى. بۇعان ساۋلەت باسقارماسى رۇقسات بەرگەن. ءبىراق تاريحي عيماراتقا كورشى ورنالاسقان بەس قاباتتى ءۇيدىڭ تۇرعىندارى عانا جان-جاققا شاعىمدانۋدا.
ەكى قاباتتى مىنا ءۇيدى وتكەن عاسىردىڭ 20 -جىلدارى ءالىباي مۇحامەدياروۆ دەگەن كوپەس سالىپتى. ونىڭ زىليحا ەسىمدى قىزىنا ۇيلەنگەن اقيىق اقىن ماعجان جۇمابايەۆ 1922 -جىلعا دەيىن قايىن اتاسىنىڭ وسى ۇيىندە تۇرعان. ساۋلەت ەسكەرتكىشى دەپ تانىلعان عيمارات 90- جىلدارى جەكە مەنشىككە ساتىلىپ كەتتى. قازىر مۇندا كوممەرتسيالىق گازەتتىڭ رەداكسياسى مەن ءتۇرلى كەڭسەلەر ورنالاسقان. ەندى بيزنەسىن كەڭەيتپەك بولعان كاسىپكەر ەسكەرتكىشتىڭ وڭ جاعىنا جاڭا نىسان سالماقشى.
ولەسيا بوندار، پەتروپاۆل قالاسىنىڭ تۇرعىنى:
- مەنىڭشە، قۇرىلىس يەسى اقىننىڭ ارۋاعىن تاپتاپ تۇر. ساۋلەت ەسكەرتكىشىن مۇراجاي ەتۋ كەرەك. ەلىمىزدە اقىن تۇرعان ۇيلەر كوپ ەمەس. ال ولار مۇندا جاڭا قۇرىلىس باستاپ، بيزنەستەرىن كەڭەيتپەكشى. سوندا ءبىر ادامنىڭ مۇددەسى ەرتەڭگى ۇرپاققا قالاتىن رۋحاني ەسكەرتكىشتەن ارتىق پا؟
ءبىر قىزىعى تاريحي ەسكەرتكىشتىڭ سىرتقى كەلبەتىن وزگەرتۋگە ونى قورعاۋعا ءتيىس شەنەۋنىكتەر قارسى ەمەس.
ليۋدميلا سوروكوتياگا، س ق و مادەنيەت جانە ساۋلەت باسقارماسىنىڭ ءبولىم باسشىسى:
- قۇرىلىستىڭ تاريحي نىسانعا ەش كەسىرى تيمەيدى. جاڭا عيمارات ساۋلەت ەسكەرتكىشىنىڭ سول جاق قابىرعاسىن جەل مەن كۇننەن قورعايدى.
كاسىپكەر وسىدان بىرنەشە جىل بۇرىن ساۋلەت ەسكەرتكىشىنىڭ سول جاعىنا جاپسارلاستىرىپ ءدامحانا سالىپتى. وعان دا شەنەۋنىكتەر كەزىندە كوز جۇما قاراعان. ال ەندى وڭ جاعىنا تۇرعىزىلاتىن جاڭا نىسانعا كورشى تۇرعان ءۇيدىڭ تۇرعىندارى قارسى. ايتۋلارىنشا، بيىكتىگى جەتى مەتر عيمارات ولارعا كۇننىڭ كوزىن كورسەتپەيتىن ءتۇرى بار.
