استاناداعى قازاق تەاترى مۇحتار اۋەزوۆ پوۆەسىنىڭ ساحنالىق نۇسقاسى «قاراش-قاراش» دراماسىن ساحنالايدى

استانا. قازاقپارات - ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى قاراشانىڭ 4-5 -كۇندەرى «قاراش-قاراش» اتتى الەۋمەتتىك درامانىڭ پرەمەراسىن وتكىزەدى.

بۇل تۋرالى قازاقپارات تىلشىسىنە تەاتردىڭ باسپا ءسوز حاتشىسى اسەم چاپاي قىزى حابارلادى.

«قازاق حالقىنىڭ ءار پەرزەنتىن ەلىن-جەرىن سۇيۋگە تاربيەلەيتىن دراما ەلوردا ساحناسىندا تۇڭعىش رەت ساحنالانباق»، - دەيدى باسپا ءسوز حاتشى.

ءا. چاپاي قىزىنىڭ ايتۋىنشا، دراما اۆتورى - جازۋشى، دراماتۋرگ قاليقان ىسقاق، قويۋشى رەجيسسەرى - ق ر ەڭبەك سىڭىرگەن قايراتكەرى الىمبەك ورازبەكوۆ. «پەسانى قازاقتىڭ ۇلى جازۋشىسى مۇحتار اۋەزوۆتىڭ «قاراش-قاراش وقيعاسى» پوۆەسى بويىنشا قاليقان ىسقاق ساحنالىق نۇسقاسىن جاساعان. بۇل رەجيسسەر الىمبەك ورازبەكوۆتىڭ اۋەزوۆ الەمىنە ءتورتىنشى رەت قادام باسۋى. بۇعان دەيىن «اباي»، «ايمان- شولپان»، «قورعانسىزدىڭ كۇنى» پەسالارىن دۇنيەگە اكەلىپ، ولار بۇگىنگى تاڭعا دەيىن كورەرمەننىڭ سۇيىكتى قويىلىمدارىنا اينالعان بولاتىن. ەلىن- جۇرتىن ويلاپ، كۇن كەشكەن ەكى ازاماتتىڭ دوستىعى، تۋعان جەرگە دەگەن ۇلكەن ماحابباتى، ار الدىنداعى ادالدىعى كورىنىس تابادى.

«جاراسباي ويدىڭ ادامى، باقتىعۇل ءىستىڭ ادامى. وسى ەكى ۇعىم ءبىرىن-ءبىرى تۇسىنۋدە ءسال جانساقتىق جىبەرسە، «ساتقىندىق» دەيتىن جاۋ تۇتقيىلدان شابۋىل جاسايدى. بۇگىنگە دەيىن كۇردەلى تاقىرىپ - «جەر» ماسەلەسى - قويىلىمنىڭ كۇرەتامىرى. اتا-بابادان قالعان دالانى ساقتاپ قالۋ - ءار قازاقتىڭ ادامي پارىزى»، - دەدى درامانىڭ مازمۇنىنا توقتالعان ءا. چاپاي قىزى.

قويىلىم كەشكى ساعات 18.30-دا باستالادى.

اۆتور: كەنجەكەي توقتامۇرات قىزى