الەمدە ەڭ ارزان سمارتفون ءۇندىستاندا شىعارىلاتىن بولادى

استانا. قازاقپارات - كانادانىڭ DataWind كومپانياسى مەن ءۇندىستاندىق Reliance Communications كومپانياسى بىرىگىپ اعىمداعى جىلدىڭ سوڭىنا دەيىن الەمدەگى ەڭ ارزان سمارتفوندى شىعارماق.

ونىڭ باعاسى -  15 دوللار (999 رۋپي). بۇل تۋرالى DataWind كومپانياسىنىڭ ديرەكتورى سۋنيت سينگح تۋلي Economic Times گازەتىنە بەرگەن سۇحباتىندا ايتتى دەپ جازادى ت ا س س.

«ءبىزدىڭ ماقساتىمىز - كەم دەگەندە 1 مىڭ رۋپيدەن ارزان سمارتفون شىعارۋ بولدى. ول Linux وپەراتسيالىق جۇيەسىندە جۇمىس ىستەيدى»، - دەدى ول.

سونداي-اق، تۋلي ساتىپ الۋشىلارعا ءبىر جىل بويىنا تەگىن ينتەرنەت بەرىلەتىن تاريفتىك جوسپار قوساتىنىن مالىمدەدى.

ايتا كەتەيىك، 2011 -جىلى DataWind كومپانياسى الەمدەگى ەڭ ارزان Aakash پلانشەت كومپيۋتەرىن شىعارعان بولاتىن. ونىڭ باعاسى قازىرگى كۋرسپەن 35 دوللار تۇردى. بۇل كومپيۋتەر ءۇندىستان ۇكىمەتىنىڭ قاراجاتى ەسەبىنەن ستۋدەنتتەرگە ەكى ەسە ارزانعا ساتىلادى دەپ جوسپارلاندى. الايدا، كوپ ۋاقىت وتپەي، بۇل ونىمدەردى قولدانىسقا ەنگىزۋدەن باس تارتقان.