رەسەي «بايقوڭىر» عارىش ايلاعىنان كەتپەيدى - ت. مۇسابايەۆ

استانا. قازاقپارات - رەسەي امۋر وبلىسىندا «ۆوستوچنىي» عارىش ايلاعىن سالىپ جاتىر، دەگەنمەن «بايقوڭىر» عارىش ايلاعىنان كەتكەلى جاتقان جوق.

بۇل تۋرالى بۇگىن ق ر ينۆەستيتسيالار جانە دامۋ مينيسترلىگى اۋەعارىش كوميتەتىنىڭ باسشىسى تالعات مۇسابايەۆ ءمالىم ەتتى.

ونىڭ حابارلاعانىنداي، رەسەي جەرىندە جاڭا عارىش ايلاعىنىڭ قۇرىلىسى 2007 -جىلدىڭ 7 -قاراشاسىندا باستالعان.

«بۇل ەگەمەن ەلدىڭ ءوز ەركى. ءبىز ولاردىڭ ىشكى ماسەلەسىنە ارالاسپايمىز. ارينە، بۇل «بايقوڭىرعا» ءوز اسەرىن بەرەدى. ر ف فەدەرالدى باعدارلامالارىنىڭ باسىم بولىگى «ۆوستوچنىيعا» كەتىپ قالادى. سولاي جوسپارلانعان بولاتىن. ءبىراق ول ءىس سونشالىقتى جاقىن ارادا جاسالمايدى. رەسەي «بايقوڭىردان» كەتپەيدى. ءبىزدىڭ قولىمىزدا ر ف جوعارى باسشىلارىنىڭ، روسكوسموس پەن رەسەي ۇكىمەتىنىڭ مالىمدەمەلەرى بار. ولار وندا «بايقوڭىردى» بولاشاقتا دا ر ف پەن ق ر بىرلەسىپ پايدالاناتىندارى جونىندە ناقتى ايتىلعان»، - دەدى ول.

«قازعارىش» باسشىسى «بايتەرەك» زىمىران كەشەنىنە دە توقتالدى.

«گەپتيلسىز ۇشاتىن انگارا زىمىرانى نەگىزىندە قۇرىلاتىن «بايتەرەك» كەشەنىن قۇرۋ بويىنشا جۇمىستار بەلسەندى جاسالۋدا. «بايقوڭىردا» جاڭا كەشەندەردى سالۋ جونىندە دە ماسەلەلەر قارالۋدا»، - دەپ ءتۇيدى ءسوزىن ت. مۇسابايەۆ.

اۆتور: جاسۇلان جولدىبايەۆ