ەۋرو وداق باسشىلىعىنىڭ استاناعا رەسمي ساپارى كۇتىلۋدە

 استانا. قازاقپارات - كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمگە قول قويۋ ءۇشىن ەۋروپالىق وداق باسشىلىعىنىڭ استاناعا رەسمي ساپارمەن كەلۋىن كۇتەمىز.

 بۇگىن اقوردادا ەلباسى نۇرسۇلتان نازاربايەۆ ءبىرقاتار ەلدىڭ ەلشىلەرىنەن سەنىم گراموتالارىن قابىلداۋ كەزىندە وسىلاي دەپ ءمالىم ەتتى.

«ەۋروپالىق وداق قازاقستاننىڭ الەمدەگى باستى ساۋدا جانە ينۆەستيتسيالىق سەرىكتەسى. ەلدىڭ جالپى تاۋار اينالىمى مەن شەتەلدىك ينۆەستيتسيا كولەمىنىڭ جارتىسىنا جۋىعى ە و- قا تيەسىلى. مەنىڭ بىلتىرعى قازان ايىنداعى بريۋسسەلدەگى ساپارىم كەزىندە كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم جونىندەگى، سونداي- اق قازاقستاننىڭ دۇنيەجۇزىلىك ساۋدا ۇيىمىنا شارتتارى تۋرالى كەلىسسوزگە قول قويىلدى. وسى تاريحي قۇجاتقا قول قويۋ ءۇشىن ەۋروپالىق وداق باسشىلىعىنىڭ استاناعا رەسمي ساپارمەن كەلۋىن كۇتەمىز. بۇل قادام قازاقستان مەن ە و قارىم- قاتىناسىنىڭ جاڭا كەزەڭىنە جول اشادى»، - دەدى پرەزيدەنت.

قازاقستانداعى ەۋروپالىق وداق وكىلدىگىنىڭ تاراتقان مالىمەتىنە قاراعاندا، قازاقستان ەۋروپالىق وداقپەن كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم جاساساتىن ورتالىق ازياداعى تۇڭعىش سەرىكتەس بولىپ تابىلادى. جاقىن ارادا قول قويۋعا جوسپارلانعان كەلىسىم 1999 - جىلعى سەرىكتەستىك پەن ىنتىماقتاستىق جونىندەگى كەلىسىمدى الماستىرىپ، ە و- قازاقستان قارىم- قاتىناستارىنىڭ زاماناۋي جانە بەرىك ىرگەتاسىن قالايدى.

اۆتور: رۋسلان عابباسوۆ